រាជធានីភ្នំពេញ ៖ កាលពីព្រឹកថ្ងៃទី១០ សីហា កន្លងមកនេះ លោកឃួង ស្រេង អភិបាលរងរាជធានីភ្នំពេញ អមដោយមន្ត្រីជំនាញក្រោមឱវាទជាច្រើនរូបទៀតបានអញ្ជើញទៅពិនិត្យប្រឡាយទឹកស្អុយជាប់ផ្លូវលេខ១០៥ អាងស្តុកទឹកស្អុយបឹងត្របែក និងស្ថានីយបូមទឹកបឹងត្របែក ក៏ដូចជាប្រព័ន្ធលូនានានៅភាគខាងត្បូងរាជធានីភ្នំពេញ ដែលមានតួនាទីយ៉ាងសំខាន់ក្នុងការរំដោះទឹកចេញក្រៅក្រុង ស្របពេលដែលកំណើនប្រជាពលរដ្ឋ ក៏ដូចសំណង់លំនៅឋានកើនឡើងឥតឈប់ឈរនាពេលបច្ចុប្បន្ន។
ជាដំបូង លោកឃួង ស្រេង រួមជាមួយមន្ត្រីជំនាញបានអញ្ជើញទៅពិនិត្យមើលប្រព័ន្ធប្រឡាយទឹកស្អុយជាប់ផ្លូវលេខ១០៥ ដែលកំពុងដំណើរការស្តារដោយមន្ទីរសាធារណការ និងដឹកជញ្ជូនរាជធានីភ្នំពេញ ។ បន្ទាប់មក ទៅពិនិត្យស្ថានីយបូមទឹកបឹងត្របែក អាងស្តុកទឹក និងប្រឡាយបឹងត្របែកខាងត្បូង ។ មន្ត្រីមន្ទីរសាធារណការនិងដឹកជញ្ជូនរាជធានីភ្នំពេញឲ្យដឹងថា ប្រឡាយទឹកស្អុយជាប់ផ្លូវលេខ១០៥ គឺជាប្រឡាយមេនាំទឹកទៅស្ថានីយបឹងត្របែកមានប្រវែងសរុប២.៤៣០ម៉ែត្រ ការថែទាំ និងស្តារប្រឡាយនេះត្រូវបានអនុវត្តជាប្រចាំ ដោយកាយនិងកើបយកអាចម៍ដីចេញពីបាតប្រឡាយកុំឲ្យស្ទះទឹកនិងនាំទឹកទៅស្ថានីយបឹងត្របែកឲ្យបានទាន់ពេលវេលា។ ស្ថានីយបូមទឹកបឹងត្របែកមានតួនាទីសំខាន់ក្នុងការបូមទឹកចេញពីតំបន់ជាច្រើននៅប៉ែកខាងត្បូងរាជធានីភ្នំពេញ ដូចជាខណ្ឌដូនពេញ ខណ្ឌ៧មករា និងខណ្ឌចំការមនជាដើម ហើយស្ថានីយនេះ បំពាក់ដោយម៉ូទ័របូមចំនួន៨គ្រឿង។
លោកឃួង ស្រេង បានណែនាំឲ្យអង្គភាពជំនាញត្រូវគិតគូរឲ្យបានម៉ត់ចត់កុំឱ្យមានការរំលោភបំពានយកផ្ទៃប្រឡាយ និងអាងស្តុកទឹកដែលធ្វើឲ្យផ្ទៃប្រឡាយកាន់តែរួមតូច ដោយត្រូវសហការជាមួយអាជ្ញាធរដែនដីពាក់ព័ន្ធ ទប់ស្កាត់កុំឲ្យមានការរំលោភដោយខុសច្បាប់តទៅទៀត។ ជាមួយគ្នានេះដែរ លោកឃួង ស្រេង ក៏បានជំរុញឲ្យមន្ទីរធនធានទឹកដំណើរការស្តារប្រឡាយបឹងត្របែកប៊ែកខាងត្បូងឲ្យបានឆាប់រហ័សមុនភ្លៀងធ្លាក់ខ្លាំងមកដល់ ដែលប្រឡាយនេះមានទទឹង២០ម៉ែត្រ បណ្តោយ៩០០ម៉ែត្រ ក្នុងនោះក៏ត្រូវធ្វើការកែលម្អមាត់ប្រឡាយ ដើម្បីឲ្យទឹកហូរចាក់ទៅក្នុងប្រឡាយបានឆាប់រហ័ស ។នាព្រឹកនោះដែរ លោកឃូងស្រេង ក៏បានអញ្ជើញទៅពិនិត្យមើលសកម្មភាពស្ថាបនាប្រព័ន្ធលូមេ១ខ្សែប្រវែង១.៨៨០ម៉ែត្រ ដាក់ប្រព័ន្ធលូមានមុខកាត់១ម៉ែត្រជាប្រព័ន្ធលូថ្មីទាំងស្រុង ដែលជាគម្រោងអភិវឌ្ឍន៍របស់ខណ្ឌដង្កោ ក្រោមការដឹកនាំអនុវត្តគម្រោងដោយលោក តិមា សោភា អភិបាលរងខណ្ឌដង្កោ ។
មន្ត្រីជំនាញឲ្យដឹងទៀតថា ប្រព័ន្ធលូថ្មីនេះចាប់ដំណើរការស្ថាបនាពីថ្ងៃទី២៥ ឧសភា មកដល់ពេលនេះសម្រេចបាន៧០%ហើយ ហើយនឹងជំរុញឲ្យរួចរាល់នៅដំណាច់ខែកញ្ញាខាងមុខ។ទោះបីយ៉ាងណា សកម្មភាពស្ថាបនានៅជួបឧបសគ្គដូចជាប៉ះពាល់ទៅលើខ្សែភ្លើង និងបំពង់ទឹកនៅក្រោមដី បណ្តាលឲ្យការងារដំណើរការយឺត ៕
ចែករំលែកព័តមាននេះ