ខេត្តកំពង់ចាម ៖ ឆ្លើយតបតាមការណែនាំរបស់លោកហ៊ុន ណេង អភិបាលខេត្តក្នុងវិធានការការពារសត្វពាហនៈដើម្បីកុំឱ្យឆ្លងជំងឺផ្សេងៗនោះ មន្ត្រីជំនាញរបស់មន្ទីរកសិកម្មខេត្តសហការជាមួយនឹងអាជ្ញាធរមូលដ្ឋាននៅព្រឹកថ្ងៃទី១១ សីហា ២០១២ ចុះចាក់ថ្នាំវ៉ាក់សាំងសាទឹកគោក្របីជូនដល់ប្រជាពលរដ្ឋចំនួន៤ភូមិ ក្នុងឃុំហាន់ជ័យ ស្រុកកំពង់សៀម បានចំនួន៦៩០ក្បាលនៅក្នុងបរិវេណមណ្ឌលសុខភាពហាន់ជ័យ។
តាមលោកគាំ ធឿន មេឃុំហាន់ជ័យ មានប្រសាសន៍ឱ្យដឹងថា ទឹកទន្លេមេគង្គកំពុងតែជន់ឡើងជាបណ្តើរៗប្រៀបច្រាំងទន្លេ បានធ្វើឱ្យប្រជាពលរដ្ឋដែលមានលំនៅឋានតាមដងទន្លេមេគង្គកំពុងតែជួបនូវការលំបាកដោយគោក្របីជាកម្លាំងអូសទាញនង្គ័ល ក្នុងការបង្កបង្កើនផលស្រែចម្ការដ៏មានសារសំខាន់ជួបនឹងកង្វះស្មៅ និងអាចប្រឈមនឹងជំងឺឆ្លងផ្សេងៗ ។
លោកនង ម៉េងហ៊ាង ប្រធានការិយាល័យផលិតកម្ម និងបសុពេទ្យខេត្តបានឱ្យដឹងដែរថា សម្រាប់គោលដៅត្រូវចុះចាក់ថ្នាំវ៉ាក់សាំងសាទឹក គោក្របីខាងលើត្រូវបានធ្វើឡើងនៅភូមិចំនួន៤ ក្នុងឃុំហាន់ជ័យ ដូចជា ភូមិមាន់ហើរ ចំនួន១៥០ក្បាល ភូមិល្វាទេ ចំនួន១៧០ក្បាល ភូមិក្រូចសើចចំនួន១១០ក្បាល ភូមិហាន់ជ័យចំនួន២៦០ក្បាល សរុបចំនួន៦៩០ក្បាល ។ សកម្មភាពនេះត្រូវបានធ្វើឡើងតាមការណែនាំពីអាជ្ញាធរខេត្ត នាយកដ្ឋានផលិតកម្ម និងបសុព្យាបាលក៏ដូចជាលោកច័ន្ទ សារុន រដ្ឋមន្ត្រីក្រសួងកសិកម្មត្រូវយកចិត្តទុកដាក់ចុះចាក់វ៉ាក់សាំងគោក្របីជូនប្រជាពលរដ្ឋ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ