ខេត្តកំពង់ចាម ៖ ឆ្លើយតបតាមការណែនាំរបស់លោក ហ៊ុន ណេង អភិបាលខេត្ត ក្នុងវិធានការការពារសត្វពាហនៈដើម្បីកុំឱ្យឆ្លងជំងឺផ្សេងៗ មន្ត្រីជំនាញរបស់មន្ទីរកសិកម្មខេត្តសហការជាមួយនឹងអាជ្ញាធរមូលដ្ឋាន នៅព្រឹកថ្ងៃទី១១ សីហា ២០១២ បានចុះចាក់វ៉ាក់សាំងការពារជំងឺគោ-ក្របីជូនដល់ប្រជាពលរដ្ឋចំនួន៤ភូមិ ក្នុងឃុំហាន់ជ័យ ស្រុកកំពង់សៀម បានចំនួន៦៩០ក្បាល។
តាមលោក គាំ ធឿន មេឃុំហាន់ជ័យ មានប្រសាសន៍ឱ្យដឹងថា ទឹកទន្លេមេគង្គកំពុងតែជន់ឡើងជាបណ្តើរៗព្រៀបច្រាំងទន្លេ ធ្វើឱ្យប្រជាពលរដ្ឋដែលមានលំនៅឋានតាមដងទន្លេមេគង្គកំពុងជួបការលំបាកនឹងកង្វះស្មៅ ហើយសត្វពាហនៈអាចប្រឈមនឹងជំងឺឆ្លងផ្សេងៗបាន ។ ដោយមើលឃើញបែបនេះលោកអភិបាលស្រុកកំពង់សៀម បានរាយការណ៍ទៅអាជ្ញាធរខេត្ត ដើម្បីមានវិធានការទប់ស្កាត់នូវជំងឺឆ្លងដល់សត្វពាហនៈជាបន្ទាន់ ហើយនៅព្រឹកថ្ងៃទី១១ សីហា លោកនង ម៉េងហ៊ាង ប្រធានការិយាល័យផលិតកម្ម និងបសុព្យាបាលខេត្ត និងសហការី បានចុះមកចាក់វ៉ាក់សាំងការពារជំងឺ«សាទឹក»គោក្របីដោយបានប្រព្រឹត្តធ្វើនៅក្នុងបរិវេណមណ្ឌលសុខភាពហាន់ជ័យតែម្តង ។ គួររំលឹកថា កាលពីរដូវទឹកជំនន់ឆ្នាំ២០១១កន្លងទៅ សកម្មភាពបែបនេះមានចំនួន៣លើក ធ្វើឱ្យគោក្របីរបស់ប្រជាពលរដ្ឋ ជៀសផុតពីជំងឺបានប្រហែលជាង៩០ភាគរយ ។
លោកស្រី ឌុក រ៉ាដាលី ប្រធានការិយាល័យកសិកម្មស្រុកកំពង់សៀមឱ្យដឹងថា ឱ្យតែរដូវទឹកជំនន់ទន្លេមេគង្គឡើងមកជន់លិចភូមិឋានរបស់ប្រជាពលរដ្ឋនៅតាមដងទន្លេមេគង្គជារៀងរាល់ឆ្នាំសកម្មភាពចុះចាក់ថ្នាំវ៉ាក់សាំងការពារជំងឺ«សាទឹក»គោក្របីជូនប្រជាពលរដ្ឋមិនដែលអាក់ខានម្តងណានោះទេ ។ យ៉ាងណាមិញពូជគោរបស់កសិករសុទ្ធសឹងតែពូជល្អៗ មានមាឌធំជាកម្លាំងចលករដ៏សំខាន់ក្នុងការបង្កបង្កើនផល សម្រាប់ដោះស្រាយជីវភាព ។
លោក នង ម៉េងហ៊ាង បានឱ្យដឹងដែរថា សម្រាប់គោលដៅត្រូវចុះចាក់ថ្នាំវ៉ាក់សាំងការពារជំងឺនៅថ្ងៃនោះ«សាទឹក»ត្រូវបានធ្វើឡើងនៅភូមិចំនួន៤ក្នុងនោះមានភូមិមាន់ហើរ ចំនួន១៥០ក្បាល ភូមិល្វាទេរ ចំនួន១៧០ក្បាល ភូមិក្រូចសើច ចំនួន១១០ក្បាល និងភូមិហាន់ជ័យ ចំនួន២៦០ក្បាល សរុបគោចំនួន៦៩០ក្បាល ។ សកម្មភាពនេះគឺធ្វើឡើងតាមការណែនាំរបស់អាជ្ញាធរខេត្តនាយកដ្ឋានផលិតកម្ម និងបសុព្យាបាល ក៏ដូចជា លោក ចន្ទ សារុន រដ្ឋមន្ត្រីក្រសួងកសិកម្ម ដែលឱ្យមន្ត្រីជំនាញត្រូវយកចិត្តទុកដាក់ចុះចាក់វ៉ាក់សាំងការពារជំងឺគោក្របីរបស់ប្រជាពលរដ្ឋ ៕
ចែករំលែកព័តមាននេះ