រាជធានីភ្នំពេញ ៖ ថ្ងៃទី១០ សីហា ២០១២ មន្ត្រីកាំកុងត្រូលផែស្ងួតចុងទីភ្នំពេញ សហការជាមួយគណៈកម្មការផ្សារបានចុះត្រួតពិនិត្យ និងធ្វើតេស្តបឋមទៅលើណែមសាច់ត្រីនៅផ្សារដើមគ ក្នុងខណ្ឌទួលគោក ។
លោកគង់ វុទ្ធី អនុប្រធានសាខាកាំកុងត្រូលឱ្យដឹងថា មន្ត្រីកាំកុងត្រូលបានចុះត្រួតពិនិត្យ និងធ្វើតេស្តបឋមឡើងវិញទៅលើណែមសាច់ត្រីដែលកំពុងដាក់លក់នៅតាមតូបចំនួន៤នៅផ្សារដើមគ ជាលទ្ធផលពុំឃើញមានការប្រើប្រាស់សារធាតុគីមីហាមឃាត់ដូចមុនឡើយ។ បើយោងតាមរបាយការណ៍វិភាគពីមន្ទីរពិសោធរបស់អគ្គនាយកដ្ឋានកាំកុងត្រូលក្នុងខែសីហានេះបង្ហាញឱ្យឃើញថា ណែមសាច់ត្រីសរុបចំនួន១៣គំរូ មានតែ១គំរូប៉ុណ្ណោះ មានសារធាតុគីមីហាមឃាត់ ។ ប៉ុន្តែតាមរបាយការណ៍វិភាគពីមន្ទីរពិសោធកាលពីខែមិថុនា ២០១២ បង្ហាញឱ្យដឹងថា ណែមសាច់ត្រីសរុបចំនួន២៣គំរូ មាន២០គំរូមានសារធាតុគីមីបូរ៉ាក់ ហើយមានតែ៣គំរូប៉ុណ្ណោះគ្មានសារធាតុគីមី ។
លោកអនុប្រធានសាខាបានបញ្ជាក់ថា នេះបង្ហាញឱ្យឃើញថា អាជីវករ អ្នកផលិត បានកែលំអផលិតផលរបស់ខ្លួន និងបានយល់ដឹងអំពីផលប៉ះពាល់នៃការប្រើប្រាស់សារធាតុគីមី ក៏ប៉ុន្តែមន្ត្រីអគ្គនាយកដ្ឋានកាំកុងត្រូលនៅតែបន្តចុះត្រួតពិនិត្យ និងតាមដានជាប្រចាំទៅលើផលិតផលនេះ និងផលិតផលមួយចំនួនទៀតដែលសង្ស័យថា មានហានិភ័យខ្ពស់ប៉ះពាល់ដល់សុខភាពអ្នកប្រើប្រាស់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ