ខេត្តស្វាយរៀង ៖ គ្រោះថ្នាក់ចរាចរណ៍៩កន្លែងផ្សេងគ្នា ក្នុងរយៈពេល៤ថ្ងៃចាប់ពីថ្ងៃទី៧ សីហា ដល់ថ្ងៃទី១០ សីហា បណ្តាលឱ្យមនុស្សប្រុសស្រីគ្រោះថ្នាក់ធ្ងន់ស្រាល១៥នាក់ ដែលហេតុការណ៍កើតឡើងភាគច្រើនបណ្តាលមកពីបើកបរក្នុងស្ថានភាពស្រវឹង ដែលគ្រោះថ្នាក់ចរាចរណ៍ទាំង៩ករណីនេះកើតឡើង ៖
កាលពីវេលាម៉ោង១២ថ្ងៃត្រង់ថ្ងៃទី៧ សីហា មាន២លើក ១-ឈ្មោះ សុខ ឆេន ភេទប្រុស អាយុ១៨ឆ្នាំ មានទីលំនៅភូមិថ្លុកព្រីង ឃុំដូង ស្រុករមាសហែក រងរបួសបែកមុខ និងក្បាលសន្លប់ដោយសារតែស្រវឹងស្រាជិះម៉ូតូដួល ២-ឈ្មោះ គង់ អីុម ភេទប្រុស អាយុ៣៣ឆ្នាំ នៅភូមិនរាទេន ឃុំឈើទាល ស្រុកស្វាយជ្រំ ត្រូវរថយន្តបើកកៀរម៉ូតូនៅខាងកើតផ្សារកអណ្តើក ខេត្តព្រៃវែង បណ្តាលឱ្យរងរបួសក្បាលពីក្រោយ ផ្ទៃមុខ ចិញ្ចើម នៅម៉ោង៦ព្រឹក។
ថ្ងៃទី៨ សីហា មាន៣លើក ១-ឈ្មោះ រិទ្ធី ភេទប្រុស អាយុ២០ឆ្នាំ នៅភូមិស្វាយរៀង សង្កាត់ស្វាយរៀង ក្រុងស្វាយរៀង គ្រោះថ្នាក់នៅវេលាម៉ោង១១និង៣០នាទីព្រឹករវាងម៉ូតូនិងម៉ូតូ រងរបួសបែកផ្ទៃមុខ បាក់ស្មាខាងស្តាំ រីឯភាគីម្ខាងទៀតរបួសស្រាលបើកម៉ូតូគេចខ្លួនបាត់ ទី២-ឈ្មោះ ទិត្យ ពន្ធរាយ ភេទប្រុស អាយុ៤០ឆ្នាំ នៅភូមិចុងព្រែក សង្កាត់ស្វាយរៀង ជិះម៉ូតូដាច់ច្រវាក់រមូរជាប់ដុំម៉ូតូដួលបោកបែកក្បាលបែកមុខមាត់ របួសស្មា ទាំងសងខាងសន្លប់នៅនឹងកន្លែង ៣-ឈ្មោះ ប៉ិច ស្រីយ៉ា ភេទប្រុស អាយុ២៨ឆ្នាំ នៅភូមិបាយ៉ាប ឃុំបាសាក់ ស្រុកស្វាយជ្រំ គ្រោះថ្នាក់នៅម៉ោង៤រសៀល ដោយសារស្រវឹងបុកម៉ូតូនិងម៉ូតូដួលបែកក្បាលពីក្រោយបែកចិញ្ចើមរលាត់ដៃជើងសន្លប់ស្តូក រីឯភាគីម្ខាងទៀតរងរបួសស្រាល ។
ថ្ងៃទី៩ សីហា កាលពីវេលាម៉ោង៧យប់ ជនរងគ្រោះឈ្មោះ ចាន់ រឿន អាយុ៥០ឆ្នាំ នៅភូមិកណ្តាល ឃុំក្រួស ស្រុកស្វាយជ្រំ ជិះម៉ូតូធ្លាក់ជង្ហុកបណ្តាលឱ្យដួលម៉ូតូបោកក្បាលទៅលើថ្នល់បែកចិញ្ចើម បែកផ្ទៃមុខ របួសស្មា និងរលាត់ដៃជើង សន្លប់ឈឹង ។ ថ្ងៃទី១០ សីហា មាន៣ករណី ១-នៅវេលាម៉ោង៦ព្រឹក រវាងម៉ូតូនិងម៉ូតូជនរងគ្រោះឈ្មោះ ឡាយ ពិសី ភេទស្រី អាយុ១៨ឆ្នាំ ជាសិស្សថ្នាក់ទី១១ នៃវិទ្យាល័យស្វាយរៀង រងរបួសមុខ រលាត់ជង្គង់សងខាង ដាច់មេជើងស្តាំ និងដាច់ម្រាមជើងស្តាំ៣ម្រាមពាក់កណ្តាល រលាត់ខ្លួនប្រាណ សន្លប់នៅនឹងកន្លែង រីឯភាគី២នាក់ទៀតរបួសស្រាល ២-កើតឡើងវេលាម៉ោង៦ល្ងាច ដោយសារស្រវឹងស្រាជិះម៉ូតូបុកឆ្កែដួលបោកក្បាលសន្លប់ ជនរងគ្រោះឈ្មោះ ឃួន ធា ភេទប្រុស អាយុ២៣ឆ្នាំ នៅភូមិស្វាយរៀង សង្កាត់ស្វាយរៀង របួសស្មាទាំងសងខាងគ្រេច.កសន្លប់នៅនឹងកន្លែង ៣-ឈ្មោះ ពៅ ភា ភេទប្រុស អាយុ៣៧ឆ្នាំ នៅភូមិស្វាយធំ ឃុំស្វាយធំ ស្រុកស្វាយជ្រំ គ្រោះថ្នាក់នៅវេលាម៉ោង១១យប់ ដោយស្រវឹងស្រាជិះម៉ូតូដួលបោកក្បាលទៅលើថ្នល់បែកចិញ្ចើម បែកមាត់បាក់ធ្មេញមុខរលាត់ដៃជើងសន្លប់នៅនឹងកន្លែងត្រូវក្រុមគ្រួសារបញ្ជូនមកមន្ទីរពេទ្យខេត្តដើម្បីសង្គ្រោះ។
សង្កេតឃើញថា គ្រោះថ្នាក់ចរាចរណ៍ទាំង៩លើក គឺអត់ពាក់មួកសុវត្ថិភាព៨លើក ហើយ១លើកមានពាក់មួកសុវត្ថិភាព បើកបរក្នុងស្ថានភាពស្រវឹង៥ករណី បើគិតពីថ្ងៃទី៦ សីហា ផងស្លាប់ម្នាក់របួសធ្ងន់១០នាក់ ស្រាល៥នាក់ដែលករណីនេះគួរឱ្យព្រួយបារម្មណ៍យ៉ាងខ្លាំង៕
ចែករំលែកព័តមាននេះ