សារព័ត៌មានដេលីមេល របស់អង់គ្លេសផ្សាយថា ស្ត្រីទី១របស់កូរ៉េខាងជើង ប្រើកាបូបម៉ាក គ្រីស្ទៀន ឌីអ៊័រ មានតម្លៃខ្ពស់ ផ្ទុយគ្នានឹងប្រជាជនដែលមានជីវភាពក្រីក្រ ។ រូបភាពដែលបង្ហាញនេះ ថតបានខណៈពេលលោកស្រី រីសូល ជូ ភរិយារបស់លោក គីម ជុងអ៊ុន អង្គុយក្បែរស្វាមីជាមេដឹកនាំកូរ៉េខាងជើង ទស្សនាការសម្តែងរបស់កងទ័ពក្នុងអង្គភាពមួយនៅក្នុងប្រទេស ។
លោកស្រី រីសូល ជូ ស្ថិតក្នុងឈុតពណ៌ស អាវខ្មៅនៅផ្នែកខាងក្រៅ និងដាក់កាបូបនៅក្បែរខ្លួន ។កាបូបដ៏ស្រស់ស្អាតនោះ មានលក់នៅក្រុងសេអ៊ូល ប្រទេសកូរ៉េខាងត្បូង ក្នុងតម្លៃ១,៨លានវ៉ុន ឬ១.៥៩៤ដុល្លារ ។ តម្លៃនេះស្មើនឹងចំណូលមធ្យមក្នុងមួយឆ្នាំរបស់ប្រជាជននៅកូរ៉េខាងជើង ។
រូបភាពទាក់ទងនឹងកាបូបយួរតម្លៃខ្ពស់របស់លោកស្រី រីសូល ជូ ត្រូវបានចុះផ្សាយ ខណៈពេលប្រជាជនជាច្រើនក្នុងចំណោមជាង២៤លាននាក់ ជួបគ្រោះអត់ឃ្លាន ចាប់តាំងពីមានគ្រោះរាំងស្ងួត កាលពីពាក់កណ្តាលទសវត្សទី៩០ មក ។ អង្គការសហប្រជាជាតិព្យាករថា ក្នុងឆ្នាំនេះមានប្រជាជនកូរ៉េខាងជើងត្រូវការជំនួយសង្គ្រោះផ្នែកម្ហូបអាហារប្រហែល៣លាននាក់ ៕
ចែករំលែកព័តមាននេះ