រាជធានីភ្នំពេញ ៖ ស្ត្រីម្នាក់បានស្លាប់ភ្លាមៗ ឯពីរនាក់ទៀតរងរបួសធ្ងន់និងស្រាល ខណៈពេលពួកគេកំពុងជិះម៉ូតូ មួយគ្រឿង ឌុបគ្នា ហើយបានទាក់ដៃចង្កូតជាមួយម៉ូតូ១គ្រឿង ទៀតដែលកំពុងធ្វើដំណើរស្របទិសគ្នា បណ្តាលដួលខ្ទាតចូលក្រោមកង់រថយន្តហ៊ីណូដឹកដី មួយគ្រឿងកិនស្លាប់និងរបួស ។
ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៧និង៤៥នាទីព្រឹកថ្ងៃទី១២ សីហា លើកំណាត់ផ្លូវជាតិលេខ៤ ត្រង់ចំណុចភូមិអង្គកែវ សង្កាត់ចោមចៅ ខណ្ឌពោធិ៍សៃនជ័យ ។ ជនរងគ្រោះដែលត្រូវរថយន្តដឹកដីកិនស្លាប់នោះឈ្មោះ សុវ៉ាត់ អាយុ១៦ឆ្នាំ ជាកម្មការិនីរោងចក្រកាត់ដេរ មានទីលំនៅភូមិត្បូង ក្រពើ ឃុំកកោះ ស្រុកសន្ទុក ខេត្តកំពង់ធំ ។ ស្នាក់នៅផ្ទះជួលភូមិវាល សងា្កត់កន្ទោក ខណ្ឌពោធិ៍សែនជ័យ ។
ចំណែកស្ត្រីម្នាក់ទៀត រងរបួសស្រាលឈ្មោះ ធី និត អាយុជិត២០ឆ្នាំ ស្នាក់នៅជាមួយគ្នា ហើយពួកគេបានជិះម៉ូតូឌុបមួយគ្រឿងម៉ាកសេ១២៥ ពណ៌ខ្មៅ បើកបរដោយបុរសឈ្មោះ យាក ចៀន អាយុ៤០ឆ្នាំ មានទីលំនៅភូមិវាល សង្កាត់កន្ទោក របួសធ្ងន់។ រីឯរថយន្តដឹកដីដែលបើកកិនមនុស្សស្លាប់នោះម៉ាកហ៊ីណូ ពណ៌ខៀវ បើកបរដោយបុរសឈ្មោះ ខាត់ ពន្លក អាយុ២៥ឆ្នាំ មានទីលំនៅភូមិ ស្លែងគង់ ឃុំដើមឫស្សី ស្រុកកណ្តាលស្ទឹង ខេត្តកណ្តាល ត្រូវប៉ូលិសប៉ុស្តិ៍ចោមចៅឃាត់ខ្លួនបានប្រគល់ឱ្យប៉ូលិសចរាចរខណ្ឌពោធិ៍សែនជ័យ កសាងសំណុំរឿងតាមនីតិវិធី ។
តាមប្រភពព័ត៌មានពីកន្លែងកើតហេតុបានឱ្យដឹងថា ម៉ូតូជនរងគ្រោះជិះគ្នា៣នាក់ បើកបរធ្វើដំណើរលើផ្លូវជាតិលេខ៤ ពីលិចទៅកើត ពេលទៅដល់ត្រង់ចំណុចកើតហេតុ បានប៉ះដៃចង្កូតជាមួយម៉ូតូមួយគ្រឿងទៀតដែលកំពុងបើកបរស្របទិសគ្នា បណ្តាលឱ្យដួលខ្ទាតចូលក្រោមកង់រថយន្តដឹកដីដែលកំពុងបើកស្របទិសគ្នាដែរនោះក៏ត្រូវកង់រថយន្តកិនស្ត្រីស្លាប់រងគ្រោះមួយរំពេច ។ ឯអ្នកបើកម៉ូតូឌុបរងរបួសធ្ងន់ និងស្រី្តម្នាក់ទៀតរងរបួសស្រាល ចំណែកម៉ូតូ១គ្រឿងទៀតមិនបានដួលទេ បានបើកគេចខ្លួនបាត់ស្រមោល ។ ដោយឡែករថយន្តដឹកដីបានព្យាយាមបើកគេចដែរ ប៉ុន្តែរត់បានចម្ងាយប្រមាណជា២គីឡូម៉ែត្រ ក៏ត្រូវកម្លាំងប៉ូលិសប៉ុស្តិ៍ចោមចៅតាមចាប់បាន ។
ប្រភពបញ្ជាក់ថា មុនពេលកើតហេតុ ស្ត្រីរងគ្រោះជិះម៉ូតូឌុបចេញពីផ្ទះជួលនៅភូមិវាលឆ្ពោះទៅលេងបងប្អូននៅផ្ទះជួលភូមិជម្ពូវ័ន ហើយក៏ជួបគ្រោះថ្នាក់បែបនេះតែម្តង ។ រថយន្តនិងម៉ូតូជនរងគ្រោះត្រូវប៉ូលិសយកទៅរក្សាទុក រង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ