តាមទិន្នន័យផ្លូវការមួយបានបង្ហាញថា អតិផរណាចិនជួបនឹងការធ្លាក់ចុះ២ឆ្នាំកន្លះ ។ បើតាមការិយាល័យស្ថិតិជាតិបានបង្ហាញថា សន្ទស្សន៍ថ្លៃទំនិញប្រើប្រាស់ក្នុងប្រទេសកើន១,៨% កាលពីខែមុន ហើយ៤ខែដើមឆ្នាំធ្លាក់ចុះ ។ នៅក្នុងឆ្នាំនេះ អាជ្ញាធរបានចាត់វិធានការនានារួមមានវិធានការទម្លាក់អត្រាការប្រាក់២ដងក៏ដូចជាបន្ធូរបន្ថយតម្រូវការថាតើទឹកប្រាក់ប៉ុន្មានដែលធនាគារត្រូវបម្រុងទុក ។
ប្រទេសចិនបានប្រកាសតួលេខផលិតផលឧស្សាហកម្ម ការវិនិយោគទ្រព្យសកម្ម និងការលក់រាយនៅល្ងាចថ្ងៃព្រហស្បតិ៍ ។ អតិផរណារបស់ចិនសម្រាប់៧ខែដំបូងឆ្នាំ២០១២ នេះមានចំនួន៣,១% ។ ជាទូទៅអតិផរណារបស់ប្រទេសនេះមានកម្រិតមធ្យម និងអាចគ្រប់គ្រងបាននាពេលអនាគត ។
ប្រសិនបើទិន្នន័យសេដ្ឋកិច្ចបញ្ចេញកាលពីថ្ងៃព្រហស្បតិ៍មានលទ្ធផលមិនល្អទេនោះ គេអាចកាត់បន្ថយអត្រាការប្រាក់បន្ថែមទៀត ឬក៏កាត់បន្ថយតម្រូវការធនបម្រុងរបស់ធនាគារ ។ មេដឹកនាំចិន លោកនាយករដ្ឋមន្ត្រី វេន ជាប៉ាវ ក៏បានសម្តែងនូវក្តីបារម្ភចំពោះការធ្លាក់ចុះសេដ្ឋកិច្ចនេះ លោកបានគូសបញ្ជាក់ថា រដ្ឋាភិបាលចិនចាំបាច់ត្រូវចាត់វិធានការបន្ថែមដើម្បីលើកស្ទួយកំណើនសេដ្ឋកិច្ច ៕
ចែករំលែកព័តមាននេះ