ខេត្តមណ្ឌលគិរី ៖ ក្រៅពីការងារបង្កបង្កើនផល ប្រជាកសិករមួយចំនួនបានឆ្លៀតពេលទំនេររកការងារផ្សេងធ្វើបន្ថែមទៀតដើម្បីបង្កើនសេដ្ឋកិច្ចគ្រួសារ តួយ៉ាងដូចជារបរឡើងត្នោតយកទឹកមករំងាស់ធ្វើស្ករ ចិញ្ចឹមជ្រូក គោ ក្របី មាន់ ទា ឬរត់ម៉ូតូឌុប ជាដើម ។
ដោយឡែករបរដឹកទូកញ្ចក់ដើរលក់តាមម៉ូតូត្រូវបានបងប្អូនប្រជាកសិករមួយចំនួនជ្រើសរើសធ្វើជាមុខរបរបន្ថែមក្រៅពីការងារស្រែចម្ការ ដែលអាចរកប្រាក់កម្រៃបានច្រើនគួរសមសម្រាប់ទ្រទ្រង់ជីវភាពគ្រួសារ ។ លោកហៀប ហ៊ា អាយុ២៦ឆ្នាំ បច្ចុប្បន្នរស់នៅភូមិសង្គមមានជ័យ ឃុំមេមត់ ស្រុកមេមត់ ខេត្តកំពង់ចាម បានឱ្យកោះសន្តិភាពដឹងថា បានជាគាត់ចាប់យកមុខរបរដឹកទូកញ្ចក់តាមម៉ូតូលក់នេះ ក៏ព្រោះតែរបរមួយនេះមិនត្រូវការដើមទុនច្រើនពេក តែអាចឱ្យគាត់រកប្រាក់មកផ្គត់ផ្គង់គ្រូសារបានមួយកម្រិត។ គាត់អាចដឹកទូយកទៅលក់ម្តងៗបានពីរទៅបីយកទៅលក់តាមបណ្តាខេត្តផ្សេងៗជាពិសេសនៅខេត្តមណ្ឌលគិរីនេះ គាត់អាចលក់បានច្រើន។
លោកហៀប ហ៊ា បញ្ជាក់ថា នៅពេលចេញលក់ម្តងៗត្រូវចំណាយពេលបីទៅប្រាំថ្ងៃទើបលក់អស់ ហើយក្នុងទូកញ្ចក់មួយគាត់ត្រូវចំណាយដើមទិញអស់២០ម៉ឺនទៅ២៥ម៉ឺនរៀល និងលក់ចេញវិញបាន៣០ម៉ឺនទៅ៤០ម៉ឺនរៀល ៕
ចែករំលែកព័តមាននេះ