ខេត្តក្រចេះ ៖ យុវជនម្នាក់បានស្លាប់បាត់បង់ជីវិតក្រោយពីក្រុមគ្រួសារនាំមកសង្គ្រោះនៅមន្ទីរពេទ្យ និងម្នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់បង្កឡើងដោយរថយន្តមេព្រៃបើកដេញរថយន្តដឹកឈើក្នុងទីប្រជុំជនហើយជ្រុលទៅបុកជនរងគ្រោះទាំងពីរនាក់ដែលកំពុងជិះម៉ូតូតាមផ្លូវ ។
មន្រ្តីប៉ូលិសចរាចរបានឱ្យដឹងថា ហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី៩ សីហា នៅមុខការិយាល័យកសិកម្មក្រុង ក្នុងភូមិរកាកណ្តាល២ សង្កាត់រកាកណ្តាល ក្រុងក្រចេះ។ ហេតុការណ៍គ្រោះថ្នាក់ដែលបណ្តាលឱ្យមានមនុស្សស្លាប់និងរបួសនេះ ត្រូវបានគេដឹងថា បណ្តាលមកពីរថយន្តមេព្រៃខណ្ឌរដ្ឋបាលព្រៃឈើក្រចេះ និងរថយន្តសមត្ថកិច្ចចំនួនពីរគ្រឿងទៀតដែលបើកតាមប្រមាញ់រថយន្តដឹកឈើមួយគ្រឿងជ្រុលទៅបុកយុវជនទាំងពីរនាក់ដែលកំពុងជិះម៉ូតូឌ្រីមសេ១២៥ ពណ៌ខ្មៅ បណ្តាលឱ្យផ្លោងជាច្រើនម៉ែត្ររងរបួសធ្ងន់ទាំងពីរនាក់ ក្នុងនោះម្នាក់បានស្លាប់ពេលក្រុមគ្រួសារបញ្ជូនមកសង្គ្រោះនៅមន្ទីរពេទ្យឯរាជធានីភ្នំពេញ ។
មន្ត្រីនគរបាលចរាចរជើងគោកបានឱ្យដឹងថា ជនរងគ្រោះទាំងពីរនាក់នេះ ម្នាក់ឈ្មោះ ស្រ៊ីម ប៊ុនហេង អាយុ១៩ឆ្នាំ មានទីលំនៅភូមិជ្រោយស្នែងក្របី ឃុំកំពង់គ ស្រុកព្រែកប្រសព្វ រងរបួសធ្ងន់បាក់ភ្លៅ និងស្លាប់ក្រោយមួយថ្ងៃបន្ទាប់ពីនាំមកសង្គ្រោះនៅមន្ទីរពេទ្យឯរាជធានីភ្នំពេញ និងម្នាក់ទៀតឈ្មោះអីុ សាវរី អាយុ២១ឆ្នាំ មានទីលំនៅ ឃុំបុសលាវ ស្រុកចិត្របុរី រងរបួសធ្ងន់។
រីឯរថយន្តបង្កហេតុម៉ាកកាមរីគូទហើម ពណ៌ស្លែ ពាក់ស្លាកលេខភ្នំពេញ2J-2013 បើកបរដោយបុរសឈ្មោះពេជ្រ វិឡា អាយុ៤១ឆ្នាំ មានទីលំនៅនៅរាជធានីភ្នំពេញ និងជាមន្ត្រីខណ្ឌរដ្ឋបាលព្រៃឈើក្រចេះ ។
ប្រភពព័ត៌មាននៅកន្លែងកើតហេតុឱ្យដឹងថា នៅយប់នោះគេឃើញរថយន្តសមត្ថកិច្ចចំនួនបីគ្រឿងបើកដេញរថយន្តកាមរីដឹកឈើមួយគ្រឿងក្នុងទិសដៅពីក្រុងក្រចេះឆ្ពោះទៅស្រុកឆ្លូង ។ ការបើករថយន្តរបស់ក្រុមសមត្ថកិច្ចតាមប្រមាញ់រថយន្តដឹកឈើនេះ ប្រៀបបាននឹងខ្សែភាពយន្តហូលីវូដ ដោយរថយន្តសមត្ថកិច្ចទាំងបីគ្រឿងនេះបើកបោះពួយដេញរថយន្តដឹកឈើលឿនស្លេវ និងកៀរគ្នាទៅវិញទៅមកធ្វើឱ្យអ្នកធ្វើដំណើរតាមផ្លូវភ័យព្រលឹងចុងសក់គ្រប់ៗគ្នា ។ ប្រភពព័ត៌មានបានឱ្យដឹងទៀតថា លុះពេលទៅដល់មុខការិយាល័យកសិកម្មក្រុងដែលផ្លូវកំពុងជួលជុល ស្រាប់តែរថយន្តរបស់មេព្រៃជ្រុលទៅបុកម៉ូតូរបស់ជនរងគ្រោះបណ្តាលឱ្យផ្លោងអូសជាច្រើនម៉ែត្រ ចំណែកឯរថយន្តដឹកឈើក៏បានបើករត់គេចទៅបាត់ទៅ ។
មន្ត្រីនគរបាលចរាចរបានឱ្យដឹងទៀតថា អ្នកបើកបររថយន្តក្រោយពីជួបឧប្បត្តិហេតុបុកម៉ូតូក៏បានរត់គេចខ្លួនហើយជនរងគ្រោះទាំងពីរនាក់ត្រូវរថយន្តសង្គ្រោះរបស់នគរបាលនាំមកសង្គ្រោះនៅមន្ទីពេទ្យខេត្តនិងបញ្ជូនបន្តទៅសង្គ្រោះនៅមន្ទីរពេទ្យឯរាជធានីភ្នំពេញ ទៀត៕
ចែករំលែកព័តមាននេះ