រាជធានីភ្នំពេញ ៖ មានហេតុការណ៍គ្រោះថ្នាក់ចរាចរណ៍២ករណី កាលពីយប់ថ្ងៃទី១១ សីហា ពាក់ព័ន្ធនឹងក្រុមអ្នកកំប្លែង ខណៈពេលធ្វើដំណើរវិលត្រឡប់ពីការសម្តែងនានាតាមទូរទស្សន៍ ព្រោះជាថ្ងៃសៅរ៍ ។ ទោះបីជាបែបណា គ្រោះថ្នាក់ទាំង២ករណីនេះ មិនមានភាពធ្ងន់ធ្ងរនោះទេ ដែលចាត់ទុកជាសំណាងដ៏ល្អផងដែរ ទោះបីមានការខូចខាតយានយន្តគួរឱ្យកត់សម្គាល់ក្តី ។
តារាកំប្លែងយាយអឿនរងរបួសថ្លោះក ខណៈពេលចេញពីសម្តែងត្រូវកូនបើករថយន្តជូនត្រឡប់ទៅផ្ទះវិញ ក៏ត្រូវរថយន្តដឹកផលិតផលកសិផលក្នុងស្រុក មាន សាច់ បន្លែ ផ្លែឈើស្រស់ បើកធ្លាក់ជង្ហុក ក៏រេចង្កូតមកបុករថយន្តរបស់គាត់ពេញទំហឹងតែម្តង។ ហេតុការណ៍នេះកើតឡើងនៅវេលាម៉ោង៩និង៥០នាទីយប់ថ្ងៃទី១១ សីហា តាមផ្លូវជាតិលេខ១ ចំណុចភូមិក្តីតាកុយ សង្កាត់វាលស្បូវ ខណ្ឌមានជ័យ។
បើតាមសម្តីរបស់តារាកំប្លែង អ្នកស្រី សួន សំអឿន ហៅយាយអឿន អាយុ៦១ឆ្នាំ ជាតារាកំប្លែងប្រចាំនៅក្រុមកំប្លែងនាយកុយ ស្នាក់នៅភូមិព្រែកធំ សង្កាត់ក្បាលកោះ ខណ្ឌមានជ័យ បាននិយាយថា មុនពេលកើតហេតុគាត់ត្រូវបានកូនប្រុសឈ្មោះ ច សុជាតិ អាយុ៣២ឆ្នាំ ជាអ្នកបើករថយន្តកាមរីឆ្លាម ពណ៌ខ្មៅ ជូនមកពីសម្តែងនៅភោជនីយដ្ឋានបុប្ផាជាយដែន មានទីតាំងនៅសង្កាត់ផ្សារដើមថ្កូវ ខណ្ឌចំការមន ។
តារាកំប្លែងដែលគេស្គាល់ច្បាស់ថា យាយអឿន និយាយទៀតថា ជារៀងរាល់ថ្ងៃ ក្រុមកំប្លែងរបស់នាយកុយរួមមាន នាយកុយ តាស៊ីស យាយអឿន នាងប្រឹមប្រិយ យាយខ្លី និងនាយក្រិន សម្តែងនៅក្នុងភោជនីយដ្ឋានបុប្ផាជាយដែនជារៀលរាល់យប់ រហូតដល់ម៉ោង៩យប់ទើបចប់ត្រឡប់ទៅផ្ទះវិញរៀងៗខ្លួន ។ យាយអឿន រៀបរាប់ថា នៅយប់កើតហេតុ ពេលដែលកូនប្រុសរបស់គាត់បើករថយន្តកាមរីឆ្លាម ពណ៌ខ្មៅ តាមផ្លូវជាតិលេខ១ ពីភ្នំពេញត្រឡប់ទៅផ្ទះវិញ ស្រាប់តែមានរថយន្តហ៊ីយ៉ាន់ដាយ ពណ៌ស ជារថយន្តដឹកផលិតផលកសិផល ក្នុងស្រុក មានសាច់ បន្លែ ផ្លែឈើស្រស់ របស់ក្រុមហ៊ុនហេបភីហ្វាម បើកពីសង្កាត់ព្រែកឯងចូលមកភ្នំពេញវិញ ក្នុងទិសដៅបញ្ច្រាសគ្នា ។ ខណៈមកដល់ចំណុចកើតហេតុខាងលើ ស្រាប់តែរថយន្តដឹកកសិផលនោះធ្លាក់ជង្ហុកក៏ដាច់កាឡេរេចង្កូតពេញផ្លូវ និងបានបុករថយន្តរបស់គាត់ពេញទំហឹង បណ្តាលឱ្យរថយន្តបែកចង្កៀង និងបោកគាត់នៅក្នុងរថយន្តផ្ទុបនឹងទ្វារបណ្តាលឱ្យថ្លោះក ។
ក្នុងហេតុការណ៍នេះ គេឃើញវត្តមាននាយកុយបានជិះរថយន្តរួមដំណើរជាមួយសន្តិសុខយាមនៅភោជនីយដ្ឋានបុប្ផាជាយដែន បានទៅចូលរួមធ្វើអន្តរាគមន៍ ហើយយាយអឿន បានទាមទារសំណងដើម្បីយកទៅជួសជុលរថយន្ត និងព្យាបាលរបួសរបស់គាត់ តែអ្នកបើកបររថយន្តដឹកកសិផលមិនអាចទាក់ទងថៅកែបាន ដោយសារយប់ទៅហើយ ត្រូវសមត្ថកិច្ចស្ទូចយករថយន្តទាំងពីរគ្រឿងទៅរក្សាទុកនៅខណ្ឌមានជ័យ ។ ចំណែកយាយអឿន ត្រូវនាយកុយដឹកយកទៅព្យាបាលរបួស ។
ហេតុការណ៍មួយទៀត រថយន្តឡិចស៊ីសRX 300 ពណ៌ស មួយគ្រឿង ដែលគេស្គាល់ថា ជារថយន្តរបស់តារាដែលទើបនឹងរះមិនទាន់មានឈ្មោះបោះសំឡេងក្នុងជួរសិល្បៈនៅឡើយទេ តែមិនបានប្រាប់ឱ្យដឹងថា តារារូបនេះឈ្មោះអ្វីទេ បានបើករថយន្តគេចពីរថយន្តមួយគ្រឿងទៀត ក៏ជ្រុលទៅបុករនាំងដែកពុះចែកទ្រូងផ្លូវបាក់រលំចំនួន៥ផ្ទាំង កាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១២ សីហា តាមមហាវិថីសហព័ន្ធរុស្ស៊ី ត្រង់ចំណុចស្តុបវត្តនាគវ័ន ក្នុងសង្កាត់ផ្សារដេប៉ូ៣ ខណ្ឌទួលគោក ។
សាក្សីនៅកន្លែងកើតហេតុបានឱ្យដឹងថា រយថន្តឡិចស៊ីស RX 300 ពណ៌ស បើកបរដោយយុវជនម្នាក់ជាតារាថ្មោងថ្មី តាមមហាវិថីសហព័ន្ធរុស្ស៊ី ពីកើតទៅលិច ខណៈមកដល់ចំណុចស្តុបវត្តនាគវ័ន ស្រាប់តែរថយន្តជ្រុលចង្កូតទៅបុករនាំងដែកពុះចែកផ្លូវបាក់រលំអស់ចំនួន៥ផ្ទាំង ធ្វើឱ្យរថយន្តរេចង្កូតឡើងទៅលើចិញ្ចើមផ្លូវរួចវិលមួយជុំបែរក្បាលចំខ្លោងទ្វារវត្តនាគវ័ន និងបម្រុងបើករត់ តែរថយន្តបាក់កាឡេមិនអាចបើកទៅមុខបាន ។
យុវជនអ្នកបើកបររថយន្តដែលគេស្គាល់ថា ជាតារាទើបនឹងរះថ្មីថ្មោងមិនស្គាល់ឈ្មោះបានឱ្យដឹងថា មូលហេតុដែលរថយន្តរបស់គេបើកបុករនាំងដែកពុះចែកផ្លូវ ដោយសារតែគេចពីរថយន្តមួយគ្រឿងទៀត ទើបជ្រុលចង្កូតទៅបុករនាំងដែករលំដូច្នេះ ។
ក្រោយពេលកើតហេតុ គេឃើញមានវត្តមានក្រុមអ្នកសិល្បៈមួយចំនួនទៀតទៅចោមរោមបម្រុងជួយអន្តរាគមន៍ដែរ តែពេលឃើញអ្នកកាសែតកំពុងថតយករូបភាព ពួកគេក៏នាំគ្នាចូលក្នុងរថយន្តបើកចេញទៅបាត់អស់ ដោយបន្សល់ទុក រថយន្តដែលខូចខាតនៅកន្លែងកើតហេតុ ត្រូវសមត្ថកិច្ចយកទៅរក្សាទុកនៅសាលារាជធានីភ្នំពេញ ដើម្បីសងការខូចខាតទ្រព្យសម្បត្តិសាធារណៈ ៕
ចែករំលែកព័តមាននេះ