រាជធានីភ្នំពេញ ៖ បុរសខ្ទើយម្នាក់ត្រូវស្លាប់បាត់បង់ជីវិតដោយការចាក់កសម្លាប់នៅក្នុងបន្ទប់ផ្ទះសំណាក់យីហោពន្លឺច័ន្ទ ស្ថិតនៅក្រុមទី៥ ភូមិចំរើនផល សង្កាត់បឹងទំពុន ខណ្ឌមានជ័យ កាលពីវេលាម៉ោង៩និង៣០នាទីយប់ថ្ងៃទី១១ សីហា ។ ទោះបីបែបណា ជនសង្ស័យជាឃាតករត្រូវបាននគរបាលប៉ុស្តិ៍បឹងទំពុនដឹកនាំដោយលោកអនុសេនីយ៍ទោ ឡូ ភារម្យ ប្រធានប៉ុស្តិ៍បឹងទំពុន ធ្វើការឃាត់ខ្លួនបានភ្លាមៗទាំងយប់ផងដែរ ។
បុរសខ្ទើយដែលស្លាប់បាត់បង់ជីវិតខាងលើនេះឈ្មោះហៀង អាយុ៣០ឆ្នាំ មានស្រុកកំណើតនៅខេត្តកំពត បច្ចុប្បន្នស្នាក់នៅមិនពិតប្រាកដក្នុងរាជធានីភ្នំពេញ ។ ចំណែកឯជនសង្ស័យជាឃាតករឈ្មោះធី ណា ហៅណា អាយុ១៩ឆ្នាំ គ្មានមុខរបរ និងស្នាក់នៅមិនពិតប្រាកដដែរ ។
ទាក់ទិននឹងការសម្លាប់ខាងលើនេះ ត្រូវបានសមត្ថកិច្ចបង្ហើបឱ្យដឹងថា ឃាតករសម្លាប់បុរសខ្ទើយក្នុងគោលបំណងប្លន់យកម៉ូតូធុនសេ១២៥ ពណ៌ខ្មៅ ស៊េរី២០០៩ តែមិនបានសម្រេច ដោយសារក្រោយពេលកើតហេតុ ឃាតករបានបណ្តើរម៉ូតូចេញពីផ្ទះសំណាក់ ក៏ត្រូវម្ចាស់ផ្ទះសំណាក់សង្ស័យឃាត់សួរនាំ ទើបដឹងថា ឈ្មោះធី ណា បានធ្វើសកម្មភាពចាក់កសម្លាប់ឈ្មោះហៀង ស្លាប់នៅក្នុងបន្ទប់ផ្ទះសំណាក់របស់ខ្លួន ។ ក្រោយពីសាកសួរដឹងរឿងនេះភ្លាម ម្ចាស់ផ្ទះសំណាក់ក៏បានរាយការណ៍ដល់សមត្ថកិច្ចមូលដ្ឋានចុះមកឃាត់ខ្លួនជនសង្ស័យជាឃាតករនាំទៅកាន់បុស្តិ៍ ដើម្បីសួរនាំ ។
នៅចំពោះមុខសមត្ថកិច្ចឈ្មោះធី ណា បានសារភាពថា មូលហេតុដែលរូបគេធ្វើសកម្មភាពសម្លាប់ឈ្មោះហៀង ដោយសារឈ្មោះហៀងបានបង្ខំឱ្យរូបគេបៀមលិង្គ ។
តាមប្រភពព័ត៌មានបានឱ្យដឹងបន្តថា មុនពេលកើេតហេតុ បុរសខ្ទើយឈ្មោះហៀង បាននាំឈ្មោះធី ណា ពីម្តុំស្តាតអូឡាំពិកមកដេកនៅផ្ទះសំណាក់ខាងលើ ដើម្បីរួមរ័ក ប៉ុន្តែទីបញ្ចប់ត្រូវស្លាប់ខ្លួនដោយសារដៃគូឈ្មោះធី ណា បានចាក់សម្លាប់នឹងកូនកាំបិតចុងស្រួចជាច្រើនកន្លែងនៅលើបំពង់ក និងក្បាលពោះ បណ្តាលឱ្យស្លាប់នៅក្នុងបន្ទប់ផ្ទះសំណាក់ដោយគ្មាននរណាជួយទាន់ ។
បច្ចុប្បន្នឈ្មោះធី ណា ត្រូវបានឃុំខ្លួននៅអធិការដ្ឋាននគរបាលខណ្ឌ ដើម្បីកសាងសំណុំរឿងបញ្ជូនទៅតុលាការផ្តន្ទាទោសតាមផ្លូវច្បាប់។ ដោយឡែកសពត្រូវសមត្ថកិច្ចយកទៅតម្កល់នៅវត្តស្ទឹងមានជ័យ រង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ