រាជធានីភ្នំពេញ ៖ កីឡាករប្រណាំងម៉ូតូចំនួន៤រូប ត្រូវបានសហព័ន្ធកីឡាប្រណាំងយានយន្តកម្ពុជា បញ្ជូនឱ្យទៅចូលរួមនៅក្នុងព្រឹត្តិការណ៍កីឡាប្រណាំងម៉ូតូឆ្លងកាត់ឧបសគ្គជ្រើសរើសជើងឯកអាស៊ី(Asia Cross Country Rally) ដែលផ្តើមចេញដំណើរពីតំបន់ឆ្នេរសមុទ្របា៉តាយ៉ា ប្រទេសថៃ ក្នុងរយៈចម្ងាយ១.៦០០គីឡូម៉ែត្រ ។
លោកមៀច សុផាន់ណា ប្រធានសហព័ន្ធកីឡាប្រណាំងយានយន្តកម្ពុជា ដែលបានមកចូលរួមក្នុងពិធីជូនដំណើរកីឡាករទាំង៤រូបនៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីរសៀលថ្ងៃទី៩ សីហា បានឱ្យដឹងថា បណ្តាប្រទេសដែលចូលរួមក្នុងព្រឹត្តិការណ៍នេះ មានចំនួន៦ ក្នុងនោះមានកម្ពុជា ថៃ ជប៉ុន កូរ៉េខាងត្បូង ឥណ្ឌា និងតៃវ៉ាន់ ។ ប៉ុន្តែនៅក្នុងព្រឹត្តិការណ៍នេះក៏មានរថយន្តចូលរួមដែរ សរុបចំនួន៨២គ្រឿង ក្នុងនោះប្រភេទរថយន្តប្រណាំងមាន២៥គ្រឿង ក្រៅពីនេះគឺរថយន្តរួមដំណើរនិងដឹកសម្ភារ រីឯម៉ូតូវិញមានចំនួន២០គ្រឿង សរុបមនុស្សមានជាង២០០នាក់ ។
ចំណែកកីឡាករកម្ពុជាដែលត្រូវទៅចូលរួមមានលោកជា ពាវ អាយុ៤៦ឆ្នាំ ធ្លាប់ចូលរួមប្រកួតកីឡាប្រណាំងម៉ូតូនៅឆ្នាំ១៩៨៨ លោកចាន់ ដារ៉ាវុធ អាយុ៣៣ឆ្នាំ ធ្លាប់ចូលរួមប្រកួតតាំងពីឆ្នាំ២០១០ លោកអីុវ ឡេង អាយុ៣៦ឆ្នាំ ធ្លាប់ចូលរួមប្រកួតកាលពីឆ្នាំ១៩៩០ និងលោកគន ផានដារ៉ា អាយុ៣៣ឆ្នាំ ឆ្លាប់ចូលរួមប្រកួតនៅ ឆ្នាំ២០០៨ ។ លោកបានឱ្យដឹងទៀតថា ការប្រកួតផ្តើមចេញពីឆ្នេរសមុទ្របា៉តាយ៉ា នៅថ្ងៃទី១១ សីហា និងបញ្ចប់នៅថ្ងៃទី១៦ សីហា នៅក្រុងសៀមរាប ខេត្តសៀមរាប ក្នុងរយៈចម្ងាយផ្លូវ១.៦០០គីឡូម៉ែត្រ ។
នេះគឺជាការប្រណាំងលើកទី៣ហើយ ដែលលើកទី១ជាព្រឹត្តិការណ៍ប្រណាំងរថយន្តឆ្លងកាត់ឧបសគ្គបានចាប់ផ្តើមនៅប្រទេសម៉ាឡេស៊ី ពីឆ្នាំ១៩៩៦ ដល់ឆ្នាំ២០០០ និងលើកទី២ធ្វើឡើងនៅប្រទេសថៃ នាឆ្នាំ២០០១ដោយឆ្លងកាត់ប្រទេសម៉ាឡេស៊ី ឡាវ ចិន វៀតណាម ហើយក៏បានឆ្លងកាត់កម្ពុជាផងដែរ ។ សម្រាប់លើកនេះកម្ពុជាមានមោទនភាពយ៉ាងខ្លាំងដែលបានធ្វើជាម្ចាស់ផ្ទះក្នុងការជិះរថយន្តឆ្លងកាត់ និងកន្លែងកំណត់ទីបញ្ចប់ ។ នៅក្នុងព្រឹត្តិការណ៍ដ៏មហាអស្ចារ្យនេះដែរ ក៏បានការអញ្ជើញចូលរួមពីតារាភាពយន្តដ៏ល្បី ជនជាតិជប៉ុន គឺលោកសូអៃកាវ៉ា និងលោកតាគូម៉ា អៅគី ជាអតីតកីឡាករជនជាតិជប៉ុនដំបូងគេ ដែលបានចូលរួមប្រកួតក្នុងកម្មវិធី Moto GP 500CC ។ ប៉ុន្តែសព្វថ្ងៃ លោកបានពិការជើងទៅហើយ ឯការមកចូលរួមរបស់លោកនាពេលនេះ គឺតាមរយៈរថយន្តប្រណាំងពិសេសរបស់លោក ។
លោកប្រធានសហព័ន្ធកីឡាប្រណាំងយានយន្តកម្ពុជា មានជំនឿយ៉ាងមុតមាំទៅលើសមត្ថភាពជិះម៉ូតូរបស់កីឡាករកម្ពុជា ហើយលោកក៏សូមជូនពរដល់កីឡាករកម្ពុជាទាំង៤រូបឱ្យទទួលបានជ័យជម្នះ និងដណ្តើមកេរ្តិ៍ឈ្មោះមកជូនជាតិមាតុភូមិរបស់យើង ៕
ចែករំលែកព័តមាននេះ