រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា បានសម្រេចជាគោលការណ៍ហើយក្នុងការទទួលយកក្រុមបាល់ទាត់ស្ត្រីចំនួន១០ក្រុមសម្រាប់ចូលរួមប្រកួតជ្រើសរើសជើងឯកថ្នាក់ជាតិប្រចាំឆ្នាំ២០១២ នេះ ។តាមគម្រោង ការប្រកួតនឹងចាប់ផ្តើមធ្វើពីថ្ងៃទី២២ សីហា ដល់ថ្ងៃទី២៩ សីហា ឆ្នាំ២០១២ ដោយចែកចេញជា២ពូលក្នុងមួយពូលមានចំនួន៥ក្រុម ។ ក្នុងពូលនីមួយៗត្រូវធ្វើការប្រកួតជម្រុះ៣ក្រុមចេញទុកតែ២ក្រុមសម្រាប់ឡើងទៅលេងបន្តនៅវគ្គពាក់កណ្តាលផ្តាច់ព្រ័ត្រ ។
បើតាមការឱ្យដឹងពីសហព័ន្ធកីឡាបាល់ទាត់កម្ពុជាថា ការប្រកួតនេះមានចំនួន២៤លើកធ្វើឡើងនៅក្នុងខេត្តបន្ទាយមានជ័យ ។ ក្រុមកីឡាបាល់ទាត់ស្ត្រីទាំង១០ដែលត្រូវចូលរួមប្រកួតនោះមាន ១-ក្លិបអភិវឌ្ឍន៍បាល់ទាត់ស្ត្រី (ភ្នំពេញ) ២-ក្រុមមន្ទីរអប់រំ យុវជន និងកីឡាខេត្តក្រចេះ ៣-ក្រុមមន្ទីរអប់រំ យុវជន និងកីឡា ខេត្តកំពង់ធំ ៤-ក្រុមមន្ទីរអបំរំ យុវជន និងកីឡាខេត្តសៀមរាប ៥-ក្រុមមន្ទីរអប់រំ យុវជន និងកីឡាខេត្តប៉ៃលិន ៦-ក្រុមមន្ទីរអប់រំ យុវជន និងកីឡាខេត្តកំពង់ឆ្នាំង ៧-ក្រុមបាល់ទាត់នារីខេត្តបាត់ដំបង ៨-ក្រុមបាល់ទាត់អង្គការកម្មវិធីសលត៍ (Salt Academy) ខេត្តបាត់ដំបង ៩-ក្រុមសមាគមខេត្តព្រះសីហនុ និង ១០-ក្រុមអធិរាជភ្នំស្វាយរបស់កងរាជអាវុធហត្ថខេត្តបន្ទាយមានជ័យ ។
គួរបញ្ជាក់ថា កាលពីឆ្នាំ២០១០ ការប្រកួតបាល់ទាត់ស្ត្រីនេះធ្វើនៅខេត្តបន្ទាយមានជ័យម្តងរួចមកហើយដែលកាលនោះក្រុមអធិរាជភ្នំស្វាយរបស់កងរាជអាវុធហត្ថខេត្តបន្ទាយមានជ័យទទួលបានចំណាត់ថ្នាក់លេខ១ ។ នៅឆ្នាំ២០១១ ការប្រកួតធ្វើនៅខេត្តបាត់ដំបង ហើយក្រុមកម្មវិធីអង្គការសលត៍ (Salt Academy) ទទួលបានចំណាត់ថ្នាក់លេខ១ ។
ពេលនេះការប្រកួតបានវិលមកធ្វើនៅខេត្តបន្ទាយមានជ័យវិញហើយដោយគេមានជំនឿថា ក្រុមអធិរាជភ្នំស្វាយរបស់កងរាជអាវុធហត្ថខេត្តបន្ទាយមានជ័យនឹងមានឱកាសលើកពានជាថ្មីម្តងទៀតមិនខាន ៕
ចែករំលែកព័តមាននេះ