ខេត្តស្វាយរៀង ៖ កាលពីព្រឹកថ្ងៃទី៨ សីហា កន្លងទៅនេះ នៅសាលប្រជុំឆ្នេរទន្លេក្រុងស្វាយរៀង មានរៀបចំកិច្ចប្រជុំបូកសរុបលទ្ធផលការងារត្រួតពិនិត្យគ្រឿងញៀនប្រចាំឆមាសទី១ ឆ្នាំ២០១២ ក្រោមអធិបតីភាពលោក កៅ ខុនដារ៉ា អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងលោក ជៀង អំ អភិបាលខេត្ត ដោយមានការចូលរួមពីលោកស្នងការ-ស្នងការរង អភិបាលស្រុក-ក្រុង អធិការ-អធិការរងនគរបាលប៉ុស្តិ៍រដ្ឋបាល ក្រុមប្រឹក្សាឃុំ-សង្កាត់ទាំង៨០ មន្ត្រីរាជការ និងទាហាន ប៉េអឹម សរុបជាង៦០០នាក់ ។
លោកវរសេនីយ៍ឯក ហែម សាបាន ស្នងការរងទទួលបន្ទុកការិយាល័យកណ្តាលយុតិ្តធម៌ នៃស្នងការដ្ឋាននគរបាលខេត្ត បានអានរបាយការណ៍ឱ្យដឹងថា ក្នុងរយៈពេល៦ខែដើមឆ្នាំ ២០១២ នេះ បើប្រៀបធៀបនឹង៦ខែដើមឆ្នាំ២០១១ សភាពការណ៍បទល្មើសគ្រឿងញៀនមានការថយចុះគួរឱ្យកត់សម្គាល់ ពិសេសបទល្មើសចែកចាយ និងប្រើប្រាស់គ្រឿងញៀន កើតឡើង២លើកលើ៧លើក ។ មូលដ្ឋានដែលកើតមានបទល្មើសចែកចាយ និងប្រើប្រាស់គ្រឿងញៀន គឺនៅក្នុងសង្កាត់បាវិត ក្រុងបាវិត ដោយឡែកមូលដ្ឋានភូមិ-ឃុំ សង្កាត់ ក្រុង ស្រុក ដទៃទៀតពុំទាន់មានសភាពការណ៍បទល្មើសគ្រឿងញៀនកើតឡើងគួរឱ្យកត់សម្គាល់ឡើយ ។
លោកវរសេនីយ៍ឯកបន្តថា ជោគជ័យនេះ គឺដោយសារការយកចិត្តទុកដាក់របស់សមត្ថកិច្ចគ្រប់លំដាប់ថ្នាក់ដោយអនុវត្តវិធានការទាំង៤ គឺវិធានការជំនាញ វិធានការចលនាមហាជន វិធានការរដ្ឋបាល និងវិធានការច្បាប់ ។ វិធានការជំនាញ គឺក្តាប់សភាពការណ៍ប្រមូលព័ត៌មានពីភ្នាក់ងារផ្តល់ព័ត៌មាន ចាប់អារម្មណ៍សំខាន់នៅទីប្រជុំជន សណ្ឋាគារ ផ្ទះសំណាក់ កាសីុណូ ក្លិបកម្សាន្ត ផ្ទះលក់កាហ្វេ ឬវីដូអូ សំដៅរកឱ្យឃើញ និងបង្ក្រាបទាន់ពេលវេលា គ្រប់សកម្មភាពជួញដូរ លក់ ចែកចាយ និងប្រើប្រាស់គ្រឿងញៀន ។
វិធានការចលនាមហាជន គ្រប់មូលដ្ឋាន ធ្វើការផ្សព្វផ្សាយអប់រំប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ សិស្ស និស្សិត តាមរយៈការប្រជុំផ្សព្វផ្សាយ ការចាត់តាំងអនុវត្តគោលនយោបាយភូមិ-ឃុំមានសុវត្ថិភាព ។ លោកបន្តទៀតថា ថ្វីដ្បិតនៅឆមាសទី១ ឆ្នាំ ២០១២ បទល្មើសគ្រឿងញៀនមានការថយចុះពិតមែន ក៏ប៉ុន្តែនេះគ្រាន់តែជាការស្រាវជ្រាវរកឃើញរបស់សមត្ថកិច្ចប៉ុណ្ណោះ វាអាចកើតមានទៀតដែលសមត្ថកិច្ចមិនទាន់ស្រាវជ្រាវ និងបង្ក្រាបបាន ជាពិសេសនៅសង្កាត់បាវិត ក្រុងបាវិត ។
លោក ជៀង អំ អភិបាលខេត្តមានប្រសាសន៍ថា ការប្រយុទ្ធប្រឆាំងគ្រឿងញៀន គឺជាចំណុចមួយសំខាន់ដែលមានចែងនៅក្នុងលក្ខណសម្បត្តិ៥យ៉ាងនៃគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល សំដៅជំរុញលើកកម្ពស់កិច្ចការពារសន្តិសុខ សុវត្ថិភាព សណ្តាប់ធ្នាប់សង្គមឱ្យកាន់តែល្អប្រសើរ ធានាដល់ការរស់នៅរបស់ប្រជាពលរដ្ឋ មានភាពសុខដុមរមនា និងធានាបាននូវការអភិវឌ្ឍសេដ្ឋកិច្ច ។
លោក កៅ ខុនដារ៉ា អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងកោតសរសើរ និងផ្តាំផ្ញើដល់សមត្ថកិច្ច និងអាជ្ញាធរគ្រប់លំដាប់ថ្នាក់ សូមបន្តសហការគ្នាប្រយុទ្ធប្រឆាំងការជួញដូរគ្រឿងញៀនឱ្យបានជោគជ័យនិងប្រកបដោយប្រសិទ្ធភាព ៕
ចែករំលែកព័តមាននេះ