រដ្ឋមន្ត្រីការបរទេសជប៉ុនលោកកូអុីជីរ៉ូ ហ្សេមបា ថ្លែងកាលពីថ្ងៃទី១១ សីហាថា ជប៉ុនគ្រោងធ្វើពាក្យបណ្តឹងទៅតុលាការយុត្តិធម៌អន្តរជាតិ CIJ ចំពោះជម្លោះដែនដីជាមួយកូរ៉េខាងត្បូងក្រោយទស្សនកិច្ចកាលពីថ្ងៃទី១០ សីហា របស់ប្រធានាធិបតីកូរ៉េខាងត្បូងលោកលីម្យុងបាក់ នៅឯប្រជុំកោះមានជម្លោះទោះបីជាមានការតវ៉ារបស់ជប៉ុនក៏ដោយ ។
នេះជាទស្សនកិច្ចលើកដំបូងនៅប្រជុំកោះមានជម្លោះរបស់ប្រធានាធិបតីកូរ៉េខាងត្បូងមួយរូប ។ លោកហ្សេមបាប្រកាសថា សេចក្តីសម្រេចចិត្តនោះធ្វើឡើងក្រោយពីពិភាក្សាជាមួយលោកម៉ាហាតូស៊ី មូតូ ឯកអគ្គរាជទូតជប៉ុនប្រចាំកូរ៉េខាងត្បូងដែលកោះហៅមកកាន់ក្រុងតូក្យូបណ្តោះអាសន្នក្រោយទស្សនកិច្ចរបស់ប្រធានាធិបតីកូរ៉េខាងត្បូងនៅប្រជុំកោះនោះ ។
យើងត្រូវម៉ឺងម៉ាត់លើបញ្ហាដែនដី ។ លោកបន្តថា វិធានការនានានឹងត្រូវប្រកាន់យកដើម្បីដោះស្រាយដោយសន្តិវិធីនូវជម្លោះនោះក្នុងស្មារតីនៃច្បាប់អន្តរជាតិ ជាពិសេសដោយប្តឹងរឿងនេះដល់តុលាការ CIJ ។ចំណែកកូរ៉េខាងត្បូងវិញបើតាមអ្នកទទួលខុសត្រូវម្នាក់ថានឹងមិនទទួលយកដំណើរការរបស់ជប៉ុនក្នុងការធ្វើអន្តរជាតិភាវូបនីយកម្ម បញ្ហាជម្លោះប្រជុំកោះ DOKDO រវាងប្រទេសទាំង២ឡើយ៕ ។
ប្រធានាធិបតីកូរ៉េខាងត្បូងកាលពីថ្ងៃទី១០សីហា បានទៅបំពេញទស្សនកិច្ចមួយនៅប្រជុំកោះDOKDO ដែលទាមទារដោយជប៉ុនដែរញ៉ាំងឱ្យផ្ទុះភាពតានតឹងខ្លាំងរវាងប្រទេសទាំង២ ។ អ្នកទទួលខុសត្រូវកូរ៉េខាងត្បូងរូបនេះធ្វើការកត់សម្គាល់ថា ជប៉ុនគ្រោងធ្វើឱ្យបញ្ហានេះក្លាយជាបញ្ហាអន្តរជាតិមួយដោយគូសបញ្ចាក់ថាក្រុងសេអ៊ូលនឹងមិនទទួលយកដាច់ខាត ព្រោះប្រជុំកោះនោះច្បាស់ណាស់ជាដែនដីកូរ៉េខាងត្បូង ។
កូរ៉េខាងត្បូងនិងជប៉ុនសុទ្ធតែទាមទារអធិបតេយ្យភាពលើប្រជុំកោះដែលគ្មានមនុស្សរស់នៅស្ថិតនៅក្នុងសមុទ្រជប៉ុនដែលប្រជុំកោះនោះក្រុងសេអ៊ូលហៅថាប្រជុំកោះDOKDO ហើយក្រុងតូក្យូហៅប្រជុំកោះតាកេស៊ីម៉ា ។ កូរ៉េខាងត្បូងត្រួតត្រាប្រជុំកោះនោះចាប់តាំងពីទសវត្សឆ្នាំ១៩៥០មក ៕
ចែករំលែកព័តមាននេះ