ប្រទេសចិនបានអំពាវនាវកាលពីថ្ងៃទី១០ សីហាកន្លងមកនេះដល់បណ្តាប្រទេសអាស៊ានឱ្យធ្វើការខិតខំប្រឹងប្រែងរួមដើម្បីថែរក្សាសន្តិភាពនៅសមុទ្រចិនខាងត្បូង ។ រដ្ឋមន្ត្រីការបរទេសចិនលោក YANG JIECHI ក្នុងសន្និសីទសារព័ត៌មានរួមមួយជាមួយសមភាគីឥណ្ឌូណេស៊ីលោកម៉ាទីណាតាឡឺហ្គាវ៉ាថ្លែងថា ថែរក្សាសន្តិភាពនិងស្ថេរភាពនៅសមុទ្រចិនខាងត្បូងគឺជាការទទួលខុសត្រូវរួមរបស់គ្រប់ប្រទេសទាំងអស់ក្នុងតំបន់ ។
ចិនត្រៀមរួមសហការជាមួយឥណ្ឌូណេស៊ីនិងប្រទេសអាស៊ានដទៃៗទៀតដើម្បីអនុវត្តឱ្យបានពេញលេញនិងមានប្រសិទ្ធភាពនូវសេចក្តីថ្លែងការណ៍ស្តីពីក្រមសីលធម៌របស់បណ្តាភាគីនៅសមុទ្រចិនខាងត្បូង ពង្រឹងទំនុកចិត្តគ្នាទៅវិញទៅមក ជំរុញកិច្ចសហប្រតិបត្តិការ ថែរក្សាសន្តិភាពនិងស្ថេរភាពក្នុងសមុទ្រចិនខាងត្បូងហើយធ្វើការដោយគោរពបណ្តាគោលការណ៍និងស្មារតីនៃសេចក្តីថ្លែងការណ៍ស្តីពីក្រមសីលធម៌របស់បណ្តាភាគីនៅសមុទ្រចិនខាងត្បូង ដោយឈរលើមូលដ្ឋាននៃកុងសង់ស៊ុលមួយ។
មុននេះនាថ្ងៃទី១០ សីហា លោក YANG បានជួបពិភាក្សាជាមួយប្រធានាធិបតីឥណ្ឌូណេស៊ី លោកស៊ូស៊ីឡូ បាមបង់យូដូយ៉ូណូ ស្តីពីការធ្វើឱ្យស៊ីជម្រៅដល់កិច្ចសហប្រតិបត្តិការយុទ្ធសាស្ត្រគ្រប់វិស័យរវាងប្រទេសទាំង២។ លោកYANG ក៏ដឹកនាំរួមគ្នាដែរជាមួយលោកម៉ាទី ណាតាឡឺហ្គាវ៉ា នូវកិច្ចប្រជុំលើកទី២របស់គណៈកម្មាធិការរួមនៃកិច្ចសហប្រតិបត្តិការទ្វេភាគី ។
លោក YANG គូសបញ្ជាក់ថា ទស្សនកិច្ចរបស់លោកនៅឥណ្ឌូណេស៊ី ប្រ៊ុយណេ និងម៉ាឡេស៊ី ពីថ្ងៃទី៩ទៅទី១៣សីហា គឺសំដៅជំរុញភាពជាដៃគូយុទ្ធសាស្ត្ររវាងចិននិងប្រទេសទាំង១០ជាសមាជិកអាស៊ានហើយពង្រីកកិច្ចសហប្រតិបត្តិការខាងកិច្ចការអន្តរជាតិនិងតំបន់៕
ចែករំលែកព័តមាននេះ