អ្នកនាំពាក្យម្នាក់របស់អូតង់រាយការណ៍កាលពីថ្ងៃទី១១សីហាថា ទាហានអាមេរិក៣នាក់ស្លាប់ដោយគ្រាប់កាំភ្លើងបាញ់ដោយនិយោជិតអាហ្វហ្គានីស្ថានម្នាក់ក្នុងមូលដ្ឋានយោធាមួយដែលធ្វើឱ្យចំនួនទាហានអាមេរិកស្លាប់ក្នុងប្រទេសនោះឡើងដល់៦នាក់ក្នុងរយៈពេលត្រឹម២៤ម៉ោង ។
ការវាយប្រហារលើកទីមួយកើតមានកាលពីព្រឹកថ្ងៃទី១០ សីហា ពេលប៉ូលិសអាហ្វហ្គានីស្ថានបាញ់សម្លាប់ទាហានអាមេរិក៣នាក់ជាសមាជិកកងកម្លាំងពិសេសពេលពួកគេត្រូវបានអញ្ជើញទៅចូលរួមក្នុងការស្រស់ស្រូបអាហារពេលព្រឹកមួយក្នុងខេត្តហែលម៉ង់ភាគខាងត្បូងអាហ្វហ្គានីស្ថាន ។ ការវាយប្រហារទី២ដែលសម្លាប់ទាហានអាមេរិក៣នាក់ទៀត កើតមានកាលពីយប់ថ្ងៃទី១០មកទី១១សីហាក្នុងស្រុក GARMSIR ជិតកន្លែងវាយប្រហារមុននេះ ។ ខ្មាន់កាំភ្លើងម្នាក់ជាអ្នកវាយប្រហារជានិយោជិតម្នាក់បម្រើការក្នុងមូលដ្ឋានយោធាមួយ ។
អ្នកនាំពាក្យរបស់អូតង់នៅអាហ្វហ្គានីស្ថានឧត្តមសេនីយ៍ GUNTER KATZ ថ្លែងថា ឧប្បត្តិហេតុទាំង២នោះពុំឆ្លុះបញ្ចាំងពីសភាពការណ៍ក្នុងទូទាំងប្រទេសអាហ្វហ្គានីស្ថានឡើយ ។ កិច្ចសហប្រតិបត្តិការរវាងកងកម្លាំងបរទេស និងកម្លាំងអាហ្វហ្គានីស្ថានទាំង៣៥០.០០០នាក់ បន្តប្រព្រឹត្តទៅយ៉ាងល្អ ។
យើងមានប៉ូលិសនិងកងទាហានប្រមាណជា៥០០.០០០នាក់ ដែលធ្វើការជាមួយគ្នាដើម្បីតស៊ូរួមធ្វើឱ្យប្រទេសនេះមានអនាគតកាន់តែប្រសើរ ។អូតង់គូសបញ្ជាក់ថា មានការវាយប្រហារបែបនេះដល់ទៅ២៦លើក ចាប់តាំងពីខែមករា មកបណ្តាលឱ្យមនុស្សស្លាប់៣៤នាក់ ៕
ចែករំលែកព័តមាននេះ