ខេត្តកំពង់ធំ ៖ កាលពីរសៀលថ្ងៃទី៨ សីហា ឆ្នាំ២០១២ ត្រូវនឹងថ្ងៃ៦រោច ខែទុតិយាសាឍ ឆ្នាំរោង ចត្វាស័ក ពុទ្ធសករាជ២៥៥៦ លោកជា ចាន់តូ សមាជិកអចិន្ត្រៃយ៍គណៈកម្មាធិការកណ្តាលគណបក្ស អនុប្រធានទី១ក្រុមការងារចុះជួយខេត្តកំពង់ធំ ប្រធានក្រុមការងារចុះជួយស្រុកសន្ទុក ស្រុកស្ទោង និងជាអគ្គទេសាភិបាលធនាគារជាតិនៃកម្ពុជា និងលោកជំទាវ ខៀវ ស៊ីណា ព្រមទាំងសហការីបាននាំយកទៀនព្រះវស្សា សម្ភារ បរិក្ខារ និងថវិកាមួយចំនួនទៅប្រគេនព្រះសង្ឃគង់នៅវត្តទាំង២៩ទូទាំងស្រុកសន្ទុក ខេត្តកំពង់ធំ ដើម្បីចូលរួមជាមួយពុទ្ធបរិស័ទចំណុះជើងវត្តសង់ឃ្លាំង ។
នាឱកាសនោះ លោកជា ចាន់តូ និងលោកជំទាវ ខៀវ ស៊ីណា ព្រមទាំងសហការីបានប្រគេនទៀនព្រះវស្សា បច្ច័យដល់វត្តទាំង២៩ ក្នុងស្រុកសន្ទុក ដែលក្នុង១វត្តៗទទួលបានទៀនព្រះវស្សា១គូ អង្ករ៥០គីឡូក្រាម ត្រីខ៥០កំប៉ុង ទឹកក្រូច២កេស ទឹកដោះគោ២៤កំប៉ុង ទឹកត្រី២យួរ ទឹកស៊ីអីុវ២យួរ ទឹកបរិសុទ្ធ៤កេស ស្ករស១២គីឡូក្រាម តែ២យួរ ប្រេងម៉ាស៊ូត២០លីត្រ និងប្រគេនបច្ច័យដល់ចៅអធិការវត្តទាំង២៩អង្គថវិកាសរុបចំនួន១២លាន៩០ម៉ឺនរៀល លោកអាចារ្យ៥៨នាក់ ថវិកាសរុបចំនួន១លាន៧៤ម៉ឺនរៀល និងបច្ច័យសម្រាប់វត្តទាំង២៩វត្ត ថវិកាសរុប៤លាន១៦ម៉ឺនរៀល និងប្រជាពលរដ្ឋ យាយជី តាជី ដែលបានចូលរួមប្រមាណ៧០នាក់ ក្នុងម្នាក់ៗទទួលបានក្រណាត់ស១ដុំ និងថវិកា១ម៉ឺនរៀល ។
លោកក៏បានផ្តាំផ្ញើដល់ប្រជាពលរដ្ឋដែលបានចូលរួម និងសូមឱ្យបងប្អូនពេលត្រឡប់ទៅវិញប្រាប់តៗគ្នាឱ្យរង់ចាំស្តាប់ការផ្សាយបន្តផ្ទាល់ពីរដ្ឋសភាជាតិនៅគ្រប់ស្ថានីយវិទ្យុ និងទូរទស្សន៍ទាំងរដ្ឋ និងឯកជនអំពីបញ្ហាព្រំដែនប្រទេសកម្ពុជា និងវៀតណាម ដែលបកស្រាយដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី៩ សីហា ឆ្នាំ២០១២ ចាប់ពីម៉ោង៨ព្រឹកទៅកុំបីខាន ៕
ចែករំលែកព័តមាននេះ