ខេត្តស្ទឹងត្រែង ៖ លោកយាយទូ គឹមឡេង អាយុ៨១ឆ្នាំ និងកូនភ្លោះពិការស្វិតដៃជើងទាំង២នាក់ ដែលបច្ចុប្បន្នរស់នៅក្នុងវត្តភ្នំស្ទឹងត្រែង ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង បានទទួលអំណោយជាថវិការបស់សប្បុរសជនជាបន្តបន្ទាប់ទៀត ដែលលើកនេះទទួលបានចំនួន១០ម៉ឺនរៀល កាលពីព្រឹកថ្ងៃទី១០ សីហា ។
លោកយាយ និងចៅភ្លោះកំព្រាពិការស្វិតដៃជើងទាំង២នាក់រស់នៅក្នុងខ្ទមរបស់វត្តជាង១០ឆ្នាំមកហើយ ខណៈលោកយាយជាអ្នកស្វែងរកអាហារ និងថវិកាពីសប្បុរសជននានាជួនពេលខ្លះសាច់ញាតិរបស់លោកយាយបានផ្តល់ជាអំណោយមានដូចជា អង្ករ នំចំណី និងថវិកាជាដើម សម្រាប់ឱ្យលោកយាយយកមកចាត់ចែងផ្គត់ផ្គង់ដល់ចៅទាំង២នាក់ដែលរស់នៅក្នុងបន្ទុករបស់គាត់ ។
លោកយាយទូ គឹមឡេង បានឱ្យដឹងថា ក្នុងអំឡុងពេលជាងមួយឆ្នាំមកនេះ ដោយមានការចុះផ្សាយពីសារព័ត៌មានកោះសន្តិភាព ឃើញថាមានសប្បុរសជនទាំងក្នុង និងក្រៅប្រទេសតែងតែគិតគូរផ្តល់ជាអំណោយសម្ភារ និងថវិកាជាហូរហែ ដែលអំណោយទាំងនោះបានជួយមួយចំណែកធំដល់ចៅទាំង២ និងរូបគាត់ ។ ជាពិសេសទៅទៀតនោះ លុយដែលបានមក រូបគាត់បានបែងចែកទៅលើការចាយវាយប្រចាំថ្ងៃ និងមួយចំណែកសម្រាប់ព្យាបាលជំងឺចៅទាំង២នាក់ ។
អំណោយជាថវិកា១០ម៉ឺនរៀលនេះកោះសន្តិភាពបានទទួលពីក្រុមប្រហុកខ្មែរក្នុងបណ្តាញទំនាក់ទំនងសង្គម Facebook ។ លោកយាយ និងចៅប្រុសទាំង២របស់គាត់ដួង ហ៊ួ និងដួង ហៃ បានថ្លែងអំណរគុណដល់សប្បុរសជននៅទីជិតឆ្ងាយទាំងអស់ដែលបានមើលឃើញពីការលំបាករបស់គាត់ ។ លោកយាយបានបួងសួងដល់ទេវតា វត្ថុស័ក្តិសិទ្ធិក្នុងលោកសូមជួយថែរក្សាម្ចាស់អំណោយទាំងអស់ឱ្យទទួលបានលាភជ័យសេរីមង្គលគ្រប់ក្រុមគ្រួសារ សូមឱ្យធ្វើអ្វីៗសម្រេចដូចសេចក្តីប្រាថ្នា ។ ម៉្យាងទៀតលោកយាយគឹមឡេង បានបួងសួងដល់បារមីដែលថែរក្សាអាណាចក្រនេះ សូមជួយថែរក្សាសប្បុរសជនឱ្យជួបតែសេចក្តីសុខ និងសេចក្តីចម្រើនគ្រប់ពេលវេលា ៕
ចែករំលែកព័តមាននេះ