លោក Flynn Fuller អនុប្រធានទូតស្តីទី នឹងចូលរួមពិធីប្រគល់អំណោយជាបរិក្ខារពេទ្យចំនួន៧៥រទេះដល់ក្រសួងសុខាភិបាល និងក្រសួងការពារជាតិកម្ពុជា ជាផ្នែកមួយនៃបេសកកម្មមានឈ្មោះថា ភាពជាដៃគូនៅតំបន់ប៉ាស៊ីហ្វិក នៅប្រទេសកម្ពុជា ដែលពិធីនេះគ្រោងធ្វើនៅថ្ងៃទី ១៣ សីហា ។
លោកឧត្តមសេនីយ៍ឯក សួន សំណាង ក៏នឹងចូលរួមក្នុងពិធីនេះដែរ ។ អំណោយនេះរួមមានគ្រឿងផ្គត់ផ្គង់ចំនួន២០០ប្រភេទ ជារបស់សល់ពីបេសកកម្មភាពជាដៃគូនៅតំបន់ប៉ាស៊ីហ្វិកដែលមានដូចជា អេប៉ុង បង់រុំ បំពង់បូម ម្ជុល បំពង់ច្រប្រាច់ និងកូនកាំបិត ។ ពិធីប្រគល់អំណោយនឹងប្រព្រឹត្តទៅនៅឃ្លាំងផ្គត់ផ្គង់ធំនៃក្រសួងសុខាភិបាល នៅចោមចៅ ។
បេសកកម្មភាពជាដៃគូនៅតំបន់ប៉ាស៊ីហ្វិក ឆ្នាំ២០១២ (Pacific Partnership 2012) មានការចូលរួមរបស់សមាជិកចម្រុះជាតិសាសន៍ ទាហាននិងស៊ីវិលចំនួនជាង១.២០០នាក់ នៅលើនាវាមន្ទីរពេទ្យឈ្មោះ USNS Mercy (T-AH19) របស់ផ្នែកសេវាកងទ័ពជើងទឹកសហរដ្ឋអាមេរិក ដែលចូលចតនៅកំពង់ផែក្រុងព្រះសីហនុ ដើម្បីផ្តល់ជំនួយផ្នែកវិស្វកម្ម ពេទ្យសត្វ ទន្តពេទ្យ និងការព្យាបាលជំងឺទូទៅដល់សហគមន៍នៅទូទាំងប្រទេសកម្ពុជា ពីថ្ងៃទី២៩ កក្កដា ដល់ថ្ងៃទី១១ សីហា ឆ្នាំ២០១២ ៕
ចែករំលែកព័តមាននេះ