ខេត្តព្រះសីហនុ ៖ កម្មករ កម្មការិនីប្រមាណជាង៦០០នាក់បាននាំគ្នាធ្វើកូដកម្មនៅខាងមុខរោងចក្រយីហោ ជុង ជិន លេខ៩ ដែលស្ថិតក្នុងតំបន់សេដ្ឋកិច្ចពិសេសបិត ត្រាំង ស្ថិតក្នុងភូមិពូធឿង សង្កាត់បិតត្រាំង ស្រុកព្រៃនប់ ដើម្បីទាមទារនូវលក្ខខណ្ឌការងារចំនួន៧ចំណុចពីថៅកែរោងចក្រ កាលពីព្រឹកថ្ងៃទី១១ សីហា ២០១២ ។
កម្មការិនីអ៊ុំ ណារី អាយុ២៤ឆ្នាំ មានទីលំនៅខេត្តកំពត បានឱ្យដឹងថា រូបនាងបានចូលបម្រើការងារនៅក្នុងរោងចក្រជុង ជិន នេះ២ឆ្នាំ មកហើយ ប៉ុន្តែពុំដែលបានទទួលប្រាក់បំណាច់ឆ្នាំ ម្តងណាឡើយ សូម្បីតែប្រាក់ភាគរយដែលខាងរោងចក្រមានគោលការណ៍នោះក៏ពុំដែលបើកបានដែរ ហើយអ្វីដែលពួកនាងមិនអាចទទួលយកបាននោះ គឺខាងរោងចក្របានបង្ខំឱ្យកម្មករ កម្មការិនីថែមម៉ោងជាច្រើនម៉ោង បើអ្នកណាមិនថែម គឺមានន័យថា អវត្តមាន ។
ទាក់ទិនទៅនឹងការតវ៉ានេះ លោកកែ ឧត្តម អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តទទួលបន្ទុកការិយាល័យការងារបាននិយាយថា ចំពោះករណីដែលកម្មករ កម្មការិនីធ្វើកូដកម្មទាមទារនេះ បើខាងមន្ទីរពិនិត្យឃើញថា រោងចក្រពុំបានគោរពទៅតាមលក្ខខណ្ឌការងាររបស់មន្ទីរការងារខេត្តដាក់ឱ្យអនុវត្តនោះ លោកនឹងធ្វើរបាយការណ៍ទៅកាន់ក្រសួងការងារ ដើម្បីបញ្ជូនក្រុមការងារអធិការកិច្ចចុះទៅធ្វើការណែនាំ និងធ្វើកិច្ចសន្យាដល់រោងចក្រ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ