រាជធានីភ្នំពេញ ៖ លោកកុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានឱ្យដឹងថា ថ្ងៃទី១០ សីហា ថា ថ្មីៗនេះស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ីបានអន្តរាគមន៍ជួយដោះស្រាយពលការិនីដែលជាជំនួយការមេផ្ទះចំនួន៣ករណី គឺ១- ពលការិនីឈ្មោះម៉ង់ ចាន់នឿន ដែលរត់ចេញពីផ្ទះថៅកែ ស្ថានទូតបានចេញលិខិតបើកផ្លូវដល់នាងដើម្បីអាចត្រឡប់មកស្រុកកំណើតវិញ ។ ដោយមានការឧបត្ថម្ភសំបុត្រយន្តហោះពី អង្គការតេណាហ្គានីតា (Tenaganita) ពលការិនីម៉ង់ ចាន់នឿន បានមកដល់កម្ពុជាវិញកាលពីថ្ងៃទី៩ ខែសីហា ឆ្នាំ២០១២ ។
២- ពលការិនីឈ្មោះខេង ពិធី ដែលរត់ចេញពីផ្ទះថៅកែ ស្ថានទូតបានអន្តរាគមន៍ជួយឱ្យនាងទទួលបានប្រាក់ខែ និងសំបុត្រយន្តហោះពីថៅកែ ។ ពលការិនីខេង ពិសី បានមកដល់កម្ពុជាវិញកាលពីថ្ងៃទី៩ ខែសីហា ឆ្នាំ២០១២ ។
៣- ពលការិនីឈ្មោះឡា ណាំ ដែលមានបញ្ហាសុខភាពខ្លះៗ ស្ថានទូតបានអន្តរាគមន៍ជួយនាំនាងទៅពិនិត្យសុខភាពនៅឯមន្ទីរពេទ្យ ។ ក្រោយជាសៈស្បើយហើយ ថៅកែបានផ្តល់សំបុត្រយន្តហោះដល់នាង ។ ពលការិនីឡា ណាំ បានមកដល់កម្ពុជាវិញនៅថ្ងៃទី១០ ខែសីហា ឆ្នាំ២០១២ ៕
ចែករំលែកព័តមាននេះ