ខេត្តកំពង់ធំ ៖ ឈរលើស្មារតីយកចិត្តទុកដាក់ក៏ដូចជាប្រសិទ្ធភាពការងារ និងការចែករំលែក នាព្រឹកថ្ងៃទី៩ សីហា នៅស្នងការដ្ឋាននគរបាលខេត្តកំពង់ធំ មានរៀបចំបើកវគ្គបណ្ដុះបណ្ដាលស្ដីពីការងារយេនឌ័រ និងអំពើហិង្សាលើស្ត្រីដែលមានការចូលរួមពីសំណាក់លោកស្រីឧត្តមសេនីយ៍ទោង៉ែត ម៉ាលី អនុប្រធាននាយកដ្ឋានកណ្ដាលនគរបាលយុត្តិធម៌ និងជាអនុប្រធានអចិន្ត្រៃយ៍ក្រុមការងារយេនឌ័រ អគ្គស្នងការដ្ឋាននគរបាលជាតិ, លោកអភិបាលរងខេត្តកំពង់ធំ, លោកឧត្តមសេនីយ៍ត្រីផាន់ សុផេង ស្នងការនគរបាលខេត្ត, លោកស្នងការរង, លោកស្រីជាប្រធាន-អនុប្រធានមន្ទីរកិច្ចការ នារី ការិយាល័យ អធិការ អធិការរង អង្គការពាក់ព័ន្ធ និងសិក្ខាកាមចំនួន៣២នាក់ ។
លោកឧត្តមសេនីយ៍ត្រី ផាន់ សុផេង ស្នងការនគរបាលខេត្តបានបញ្ជាក់ពីសកម្មភាពការងារយេនឌ័រនៅក្នុងស្នងការដ្ឋាននគរបាលខេត្ត ថា ដោយមានការយកចិត្តទុកដាក់ពីលោកឧបនាយករដ្ឋមន្ត្រី និងលោកនាយឧត្តមសេនីយ៍អគ្គស្នងការនគរបាលជាតិ ក្នុងចំណោមកងកម្លាំងនគរបាលជាស្ត្រីដែលមានចំនួន១១១នាក់ គឺបានទទួលឋានន្តរស័ក្តិចាប់ពីថ្នាក់វរសេនីយ៍ឯកដល់ពលបាលទោ ក្នុងនោះមានស្នងការរង នាយរងការិយាល័យ អធិការរង នាយ និងនាយរងផ្នែក និងបានរៀបចំជាសមាសភាពក្រុមការងារយេនឌ័រចំនួន១១នាក់ ស្រី៥នាក់ ។ ក្រៅពីការបំពេញតួនាទី និងភារកិច្ចជាច្រើនជានគរបាលយុត្តិធម៌ ស្រ្តីទាំងនោះក៏បានចូលរួមជាមួយកិច្ចការសង្គមស៊ីវិលបានយ៉ាងច្រើនផងដែរ។ ទន្ទឹមការងារខាងលើ ស្នងការដ្ឋានក៏បានរៀបចំ និងលើកទឹកចិត្តក៏ដូចជាឆ្លើយតបទៅនឹងការខិតខំប្រឹងប្រែងរបស់នគរបាលជានារីដោយបានដំឡើងឋានន្តរស័ក្តិ និងតួនាទីចំនួន៣០នាក់ និងមានការសរសើរលើកទឹកចិត្តចំនួន១៥នាក់ ។
លោកអ៊ុត សំអន អភិបាលរងខេត្តក៏បានបញ្ជាក់ថា ក្នុងនាមថ្នាក់ដឹកនាំខេត្ត លោកមានការចាប់អារម្មណ៍យ៉ាងខ្លាំងជាមួយសកម្មភាពរបស់ស្ត្រីនាពេលបច្ចុប្បន្នមិនថាក្នុងជួរដ្ឋ និង ក្រៅរដ្ឋ គឺស្ត្រីបានចូលរួមជាដៃគូយ៉ាងសកម្មជាមួយបុរសដែលសបញ្ជាក់ឱ្យឃើញពីការយល់ដឹងនិងការសម្រេចចិត្តដ៏ត្រឹមត្រូវរបស់ស្ត្រីនាពេលបច្ចុប្បន្ន និងអនាគត ។ តាមរយៈវគ្គបណ្ដុះបណ្ដាលក្នុងឱកាសនេះលោកសង្ឃឹមថា ជាសារថ្មីមួយសម្រាប់ជំរុញនិងលើកកម្ពស់សមត្ថភាពស្ត្រីទាំងក្នុងការបំពេញការងារនិងការសម្រេចចិត្ត ។
ស្ថិតក្នុងឱកាសនោះ លោកស្រីឧត្តមសេនីយ៍ទោ ង៉ែត ម៉ាលី បានលើកឡើងថា ថ្វីដ្បិតតែវគ្គបណ្ដុះបណ្ដាលមានច្រើនលើក និងបទពិសោធន៍ច្រើនរាប់មិនអស់ក្ដី ប៉ុន្តែអ្វីដែលជាការចាប់អារម្មណ៍នោះគឺការពង្រឹងបន្ថែមនិងជំរុញលើកកម្ពស់សមត្ថភាពការផ្សព្វផ្សាយឱ្យកាន់តែទូលាយថែមទៀតដល់គ្រប់ស្រទាប់មជ្ឈដ្ឋាន ។ លោកស្រីមានជំនឿថា ការងារយេនឌ័រនេះ មិនមែនអនុវត្តតែក្នុងជួរកងកម្លាំងប៉ុណ្ណោះទេ តែគឺជាការងារសាកល ដែលត្រូវចាប់អារម្មណ៍និងយកចិត្តទុកដាក់គិតគូរឱ្យបានហ្មត់ចត់ ៕
ចែករំលែកព័តមាននេះ