ខេត្តកំពង់ស្ពឺ ៖ របាយការណ៍ស្តីអំពីស្ថានភាពបង្កបង្កើនផលស្រូវនិងដំណាំរដូវវស្សាឆ្នាំ២០១២ របស់មន្ទីរកសិកម្មខេត្តគិតត្រឹមថ្ងៃទី៦ សីហា ឱ្យដឹងថា នៅក្នុងក្រុង-ស្រុកទាំង៨ក្នុងខេត្តសម្រេចសាបព្រោះបុកដាំ បាន៤៤.៣៣២ហិកតា និងដាំដំណាំរួមផ្សំបាន៤.០៤៥ហិកតា ។
របាយការណ៍បញ្ជាក់ថា ផលប៉ះពាល់ដោយគ្រោះរាំងស្ងួតមានចំនួន២៣ឃុំ លើផ្ទៃដីសរុប៣០៧ហិកតា ក្នុងនោះសំណាប២៣៨ហិកតា សន្ទូង៦៩ហិកតា ។ ចំពោះស្រុកដែលជួបគ្រោះរាំងស្ងួតមាន៥ គឺ១-ស្រុកបរសេដ្ឋ មានឃុំកក់ ឃុំកាត់ភ្លុក ឃុំភក្តី និងឃុំផុងមានផ្ទៃដីប៉ះពាល់សំណាប ៣៥ហិកតា ។ ២-ស្រុកឧដុង្គ គ្រោះរាំងស្ងួតប៉ះពាល់ ឃុំត្រាចទង ឃុំយុទ្ធសាមគ្គី ឃុំក្សេមក្សាន្ត ឃុំជម្ពូព្រឹក្ស ឃុំដំណាក់រាំង ឃុំជើងរាស់ ឃុំភ្នំតូច ឃុំពាំងល្វាជើង ឃុំមានជ័យ ផ្ទៃដីប៉ះពាល់៩២ហិកតា ក្នុងនោះសំណាប៥២ហិកតា សន្ទូង៤០ហិកតា ។ ៣-ស្រុកគងពិសី គ្រោះរាំងស្ងួតប៉ះពាល់ឃុំព្រៃវិហារ ឃុំមហាឫស្សី ឃុំស្តុក ប៉ះពាល់ផ្ទៃដីសំណាប១៥ហិកតា ។ ៤-ស្រុកភ្នំស្រួច គ្រោះរាំងស្ងួតប៉ះពាល់ឃុំព្រៃរំដួល ឃុំអូរ ឃុំជាំសង្កែ ឃុំដំបូករូង ផ្ទៃដីប៉ះពាល់៨០ហិកតា ក្នុងនោះសំណាប៦០ហិកតា សន្ទូង២០ហិកតា និង៥-ស្រុកឱរ៉ាល់ គ្រោះរាំងស្ងួតប៉ះពាល់ឃុំត្រពាំងជោរ ឃុំសង្កែសាទប និងឃុំតាសាល ផ្ទៃដីប៉ះពាល់សរុប៨៥ហិកតា ក្នុងនោះសំណាប៧៨ហិកតា សន្ទូង៩ហិកតា ។
ការរាំងស្ងួតបែបនេះបើនៅតែបន្តរយៈពេលយូរទៀត អាចមានផលប៉ះពាល់ខូចខាតសំណាបនិងសន្ទូងដែលធ្វើហើយនោះ ហើយផ្ទៃដីមួយចំនួនទៀតក៏ពុំអាចធ្វើការដកស្ទូងបានឡើយ ៕
ចែករំលែកព័តមាននេះ