ខេត្តកំពង់ឆ្នាំង ៖ បុរសម្នាក់ជិះម៉ូតូថ្មីដែលទើប នឹងទិញបានជិះទៅដួលលើផ្លូវលំក្រាលក្រួសក្រហមបណ្តាលឱ្យស្លាប់បាត់បង់ជីវិត កាលពីវេលាម៉ោង៥និង៣០នាទីល្ងាចថ្ងៃទី៩ សីហា នៅចំណុចស្រែទំនាបត្រពាំងក្រវាន់ស្ថិតក្នុងភូមិក្រាំងលាវ ឃុំក្រាំងលាវ ស្រុករលាប្អៀរខេត្តកំពង់ឆ្នាំង ។
មន្ត្រីប៉ូលិសស្រុករលាប្អៀរបានប្រាប់តាមទូរស័ព្ទថា ជនរងគ្រោះឈ្មោះអ៊ុន ផង់ អាយុ ៤៥ឆ្នាំ មានទីលំនៅភូមិក្រាំងលាវ ឃុំក្រាំងលាវ ។ ប្រភពដដែលបានបន្តដោយស្រង់សម្តីបងប្អូនជនរងគ្រោះថា បុរសរងគ្រោះទើបនឹងទិញម៉ូតូថ្មីម៉ាកស្មាស់រីវ៉ូ សេ៊រី២០១២ពណ៌ខ្មៅមួយគ្រឿង ហើយនៅមុនពេលកើតហេតុ បានជិះម៉ូតូនោះសាកនិងទៅហួសមើលស្រែផង ប៉ុន្តែនៅល្ងាចនោះពេលជិះចេញពីផ្ទះផុតបន្តិចក៏មានភ្លៀងធ្លាក់ជាខ្លាំង ពេលនោះជនរងគ្រោះប្រហែលជិះម៉ូតូក្នុងល្បឿនលឿន ហើយគាប់ជួនផ្លូវរអិល និងមិនសូវប្រសប់បើកម៉ូតូផងនោះក៏ដួលបណ្តាលឱ្យរងរបួសជាទម្ងន់ និងបន្តិចក្រោយមកក៏ស្លាប់បាត់បង់ជីវិតតែម្តង ។ តាមប្រជាពលរដ្ឋដែលមានផ្ទះនៅជិតលំនៅឋានជនរងគ្រោះបាននិយាយថា ជនរងគ្រោះខិតខំសន្សំប្រាក់ទម្រាំបានទិញម៉ូតូថ្មីនេះប៉ុន្តែពេលទិញម៉ូតូថ្មីបានហើយបែរជាជិះឱ្យដួលស្លាប់បែបនេះទៅវិញ ៕
ចែករំលែកព័តមាននេះ