ខេត្តកណ្តាល ៖ បុរសម្នាក់ត្រូវប៉ូលិសចរាចរក្រុងតាខ្មៅចាប់ខ្លួន បន្ទាប់ពីបុរសនោះផឹកស៊ីស្រវឹងក្នុងហាងបង្កទំនាស់វាយតប់គ្នារហូតមានរបួសស្នាម ហើយបើករថយន្តរត់គេចបានទៅកៀរម៉ូតូមួយគ្រឿង រួចបើករត់ទៅបុកម៉ូតូមួយគ្រឿងទៀត បណ្តាលឲ្យអ្នកបើកបរម៉ូតូរបួសបាក់ជើងទាំងសងខាង។ ក្រោយពេលបើករថយន្តបុកម៉ូតូបណ្តាលឲ្យមានមនុស្សរងរបួសរួចអ្នកបើករថយន្តមិនបានឈប់ទទួលខុសត្រូវទេ បែរជាព្យាយាមបើករត់ ប៉ុន្តែត្រូវប៉ូលិសស្ទាក់ចាប់បាន។ ហេតុការណ៍នេះបានកើតឡើង កាលពីវេលាម៉ោង៥ល្ងាចថ្ងៃទី៨ សីហាចំណុចខាងមុខវត្តព្រែកហូរ លើកំណាត់ផ្លូវជាតិលេខ២ ស្ថិតក្នុងភូមិព្រែកហូរលិច សង្កាត់ព្រែកហូរ ក្រុងតាខ្មៅ ។
មន្ត្រីប៉ូលិសចរាចរក្រុងតាខ្មៅបានឲ្យដឹងថា ជនរងគ្រោះឈ្មោះយុទ្ធ វិបុល ភេទប្រុស អាយុ៣៥ឆ្នាំ ជាកសិករ មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ បើកម៉ូតូមួយគ្រឿងម៉ាកយ៉ាម៉ាហា ពណ៌ខ្មៅ ក្នុងទិសដៅពីត្បូងទៅជើង។ ក្រោយពីកើតហេតុត្រូវបានដឹកតាមរថយន្តយកទៅសង្រ្គោះនៅមន្ទីពេទ្យចាក់អង្រែ។ ចំណែករថយន្តបង្កហេតុម៉ាកតូយូ៉តា តាកូម៉ា មួយបាំងកន្លះ ពណ៌ទឹកប្រាក់ បើកបរដោយឈ្មោះធឿន ប៉ុណ្ណា ភេទប្រុស អាយុ២៦ឆ្នាំ ជានិស្សិត មានទីលំនៅក្នុងភូមិដំណាក់សង្កែសង្កាត់ព្រែកកំពិស ខណ្ឌដង្កោ រាជធានីភ្នំពេញ បើកក្នុងទិសដៅពីជើងទៅត្បូង ។
មន្ត្រីប៉ូលិសដដែលបានបន្តទៀតថា មុនពេលកើតហេតុឈ្មោះធឿន ប៉ុណ្ណា បានផឹកស៊ីនៅក្នុងហាងមួយរហូតស្រវឹងហើយមានទំនាស់ពាក្យសម្តីជាមួយអ្នកផឹកស៊ីជាមួយគ្នាក៏ឈានដល់ការវាយតបគ្នាមានរបួសស្នាម ហើយឈ្មោះធឿន បុ៉ណ្ណា បានបើករថយន្តម៉ាកតូយូ៉តាគេចខ្លួនដោយបើកតាមបណ្តោយផ្លូវលំក្នុងសង្កាត់កំពង់សំណាញ់ ហើយបានបើកកៀរម៉ូតូមួយគ្រឿងម៉ាកសង់កូរ៉េបណ្តាលឲ្យអ្នកបើកម៉ូតូរងរបួសស្រាល ហើយរថយន្តមិនបានឈប់ដោះស្រាយទេ បែរជាបន្ថែមល្បឿនយ៉ាងលឿនបើកគេចតាមផ្លូវលេខ១១៥ សំដៅទៅព្រែកហូរក្នុងទិសដៅពីជើងទៅត្បូងបានចម្ងាយជាង១គីឡូម៉ែត្រ ក៏បានបុកជាមួយម៉ូតូមួយគ្រឿងទៀតម៉ាកយ៉ាម៉ាហា ពណ៌ខ្មៅ បើកបរដោយបុរសម្នាក់តាមបណ្តោយផ្លូវជាតិលេខ២ ក្នុងទិសដៅពីត្បូងទៅជើងចំពីមុខពេញមួយទំហឹង បណ្តាលឲ្យអ្នកបើកម៉ូតូដួលលើផ្លូវ ហើយរថយន្តបានកិនត្រូវជើងទាំងសងខាង បណ្តាលឱ្យបាក់ជើងទាំងពីរតែម្តង ។
មន្ត្រីប៉ូលិសបានបញ្ជាក់ថា ក្រោយពីមានហេតុការណ៍កើតឡើង អ្នកបើករថយន្តបានបន្ថែមល្បឿនបើកគេចតាមបណ្តោយផ្លូវជាតិលេខ២ ឯជនរងគ្រោះត្រូវបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ ។ មន្ត្រីប៉ូលិសចរាចរក្រុងតាខ្មៅបានឲ្យដឹងថា ក្រោយពេលកើតហេតុភ្លាមៗសមត្ថកិច្ចនគរបាលបានរាយការណ៍តាមវិទ្យុទាក់ទងឲ្យសមត្ថកិច្ចពាក់ព័ន្ធតាមបណ្តោយផ្លូវជាតិលេខ២ ជួយអន្តរាគមន៍ស្ទាក់ចាប់ បានទាំងរថយន្តនិងអ្នកបើកបរ ក្នុងភូមិសាស្ត្រសង្កាត់ព្រែកកំពិស ខណ្ឌដង្កោ រាជធានីភ្នំពេញ រួចនាំទៅកាន់អធិការដ្ឋាននគរបាលក្រុងតាខ្មៅ ដោយអ្នកបើកបររថយន្តមានសភាពស្រវឹងខ្លាំង ។ នៅរសៀលថ្ងៃទី៩ សីហា អ្នកបើករថយន្តត្រូវសមត្ថកិច្ចប៉ូលិសកសាងសំណុំរឿង និងបញ្ជូនទៅកាន់សាលាដំបូងខេត្ត ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ