ខេត្តស្វាយរៀង ៖ នាព្រឹកថ្ងៃទី១០ សីហា នៅសាលប្រជុំនៃស្នងការដា្ឋននគរបាលខេត្ដ មានប្រារព្ធពិធីផ្ទេរភារកិច្ច តែងតាំងមុខតំណែង និងបំពាក់ឋានន្តរសក្តិដល់មន្ត្រីនគរបាល ក្រោមអធិបតីភាពលោកឧត្តមសេនីយ៍ត្រី ប្រាជ្ញ រឹម ស្នងការនគរបាលខេត្ត ។ ចូលរួមក្នុងពិធីនោះមានលោក-លោកស្រីស្នងការរងនគរបាលខេត្ដ ប្រធានការិយាល័យ អធិការគ្រប់ស្រុក ព្រមទាំងមន្ដ្រីនគរបាលខេត្ដប្រមាណជាង១០០នាក់ ។
តាមប្រកាសរបស់ក្រសួងមហាផ្ទៃលេខ៤១៥ និងលេខ២៣៩ ដែលអានដោយលោកវរសេនីយ៍ទោ ពុត កយ បានសម្រេចផ្ទេរភារកិច្ចមន្ដ្រីនគរបាលខេត្ដចំនួន២០រូបឱ្យចូលកាន់តួនាទីថ្មី និងបំពាក់ឋានន្ដរសក្ដិដល់មន្ដ្រីនគរបាលចំនួន១១៦រូប ក្នុងនោះថា្នក់អនុសេនីយ៍ឯកចំនួន១៧រូប អនុសេនីយ៍ទោ១៧រូប អនុសេនីយ៍ត្រី១៥រូបថា្នក់ព្រិន្ទបាលឯក៣៧រូប ព្រិន្ទបាលទោ២១រូប ពលបាលឯក៧រូប និងពលបាលទោ២រូប។
ថ្លែងក្នុងឱកាសនោះ លោកឧត្ដមសេនីយ៍ត្រី ប្រាជ្ញ រឹម ស្នងការនគរបាលខេត្ដ បានលើកឡើងពីសភាពការណ៍នយោបាយរបស់ប្រទេសកម្ពុជា ពិសេសគឺប្រសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ឆ្លើយបំភ្លឺដល់ជនរួមជាតិទាំងអស់កាលពីព្រឹកថ្ងៃទី៩ សីហា នៅក្នុងរដ្ឋសភាឆ្លើយតបទៅនឹងពាក្យចោទប្រកាន់របស់គណបក្សប្រឆាំង ដែលលើកឡើងថា កម្ពុជាកំពុងបាត់បង់ទឹកដឹទៅលើប្រទេសវៀតណាមនោះសម្ដេចបានបកស្រាយច្បាស់ណាស់គឺកម្ពុជា មិនបានបាត់បង់ទឹកដីនោះទេ។
លោកឧត្ដមសេនីយ៍ត្រីស្នងការបានបន្ដទៀតថា ចំពោះបញ្ហាយោធិនរត់ចោលជួរ កម្លាំងនគរបាលត្រូវតែប្រមូលដកហូតយកឯកសណ្ឋានមកវិញទាំងអស់ កុំឱ្យពួកទាំងនោះយកឯកសណ្ឋានយោធិនទៅពាក់ដើរបង្អួត ឬគំរាមគេឯងនាំឱ្យប៉ះពាល់ដល់កិត្ដិយសយោធិនពិតប្រាកដ។ លោកក៏បានលើកឡើងពីការចុះធ្វើ្វអត្ដសញ្ញាណប័ណ្ណជូនប្រជាពលរដ្ឋក្នុងខេត្ដសា្វយរៀងផងដែរ ដែលកន្លងមកធ្លាប់មានសារព័ត៌មានចុះផ្សាយថា មន្ដ្រីចុះធ្វើអត្ដសញ្ញាណប័ណ្ណមានការយកលុយយកកាក់ពីប្រជាពលរដ្ឋ ដែលព័ត៌មាននេះវាអាចពិតខ្លះ មិនពិតខ្លះនាពេលកន្លងមក ប៉ុន្ដែនាពេលបច្ចុប្បន្ននេះ លោកសូមផ្ដាំផ្ញើដល់លោកអធិការគ្រប់ស្រុកទាំងអស់សូមប្រយ័ត្នដាច់ខាតកុំឱ្យមានការយកលុយពីប្រជាពលរដ្ឋឱ្យសោះ។
ម្យ៉ាងទៀត ក៏ត្រូវចៀសវាងជាដាច់ខាតកុំឱ្យមានចេញប័ណ្ណដោយគា្មនលិខិតទទួលស្គាល់ពីអាជ្ញាធរដែនដីឱ្យសោះ ។ ចំណុចសំខាន់រាល់ការចំណាយផ្សេងៗរបស់មន្ដ្រីធ្វើអត្ដសញ្ញាណប័ណ្ណ ស្នងការដ្ឋានខេត្ដនឹងព្យាយាមស្វែងរកថវិកាសម្រាប់ឧបត្ថម្ភ ដើម្បីកុំឱ្យមានការលួចទារយកលុយពីប្រជាពលរដ្ឋ ហើយយកលេសថាសម្រាប់ចំណាយលើឯកសារផ្សេងៗនោះ។ ម្យា៉ាងទៀត សកម្មភាពចុះធ្វើអត្ដសញ្ញាណប័ណ្ណនេះ អធិការស្រុកគ្រប់ស្រុក ត្រូវតែចាប់អារម្មណ៍ឱ្យបានខ្លាំង និងត្រួតពិនិត្យឱ្យបានម៉ត់ចត់។
នៅក្នុងឱកាសនោះដែរ លោកស្នងការក៏បានលើកឡើងពីបញ្ហាកុងត្រូលជជុះនៅតាមដងផ្លូវនានាទូទាំងខេត្ដ ដោយបានបញ្ជាក់ថា កុងត្រូលជជុះទាំងអស់ត្រូវតែបញ្ឈប់កុំឱ្យមានឱ្យសោះនៅលើទឹកដីខេត្ដសា្វយរៀង ហើយបើនៅតែកើតមាននៅក្នុងមូលដា្ឋនណាមួយនោះ អធិការស្រុកនោះត្រូវតែទទួលខុសត្រូវ។ ជាមួយគា្ននេះ អធិការស្រុកទាំងអស់ត្រូវត្រៀមកម្លាំងសហការជាមួយនិស្សិតស្ម័គ្រចិត្តចុះវាស់វែងដីធ្លីយ៉ាងតិចពី២ទៅ៣នាក់ ដើម្បីតាមការពារសុវត្ថិភាពរបស់ពួកគេ ៕
ចែករំលែកព័តមាននេះ