ខេត្តព្រះសីហនុ ៖ នារសៀលថ្ងៃទី៧ សីហា លោកវរសេនីយ៍ត្រី វ៉ា ចាន់ថន នាយការិយាល័យស្រាវជ្រាវបទលើ្មសនៃបញ្ជាការដ្ឋានកងរាជអាវុធហត្ថខេត្តព្រះសីហនុ បានប្រគល់ម៉ូតូជូនដល់ម្ចាស់វិញ បន្ទាប់ពីចោរបានលួចយកហើយប្លុងចោលក្នុងព្រៃអាកាស្យា ។
លោកវរសេនីយ៍ត្រី វ៉ា ចាន់ថន បានឱ្យដឹងថា ម៉ូតូដែលប្រគល់ជូនទៅឱ្យម្ចាស់វិញនេះ ម៉ាកហុងដាសេ១២៥ ស៊េរី២០០៨ ពណ៌ខ្មៅ ពាក់ស្លាកលេខតាកែវ ១C-6955 លេខតួ-លេខម៉ាស៊ីនHC09E-8249478 ជាកម្មសិទ្ធិរបស់ឈ្មោះ យ៉ែម ហ៊ាង អាយុ២៤ឆ្នាំ ជាគ្រូបង្រៀនសាលាឯកជន មានស្រុកកំណើតទីរួមខេត្តតាកែវ ស្នាក់នៅផ្ទះជួល ផ្លូវលេខ៥៨ ភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
លោក វ៉ា ចាន់ថន បានឱ្យដឹងទៀតថា យោងតាមការរៀបរាប់របស់ម្ចាស់ម៉ូតូឱ្យដឹងថា កាលពីថ្ងៃទី៩ ឧសភា ឆ្នាំ២០១២ ខ្លួនបានជិះម៉ូតូចេញពីផ្ទះនៅវេលាម៉ោង៧និង៣០នាទីព្រឹក ដើម្បីទៅបង្រៀនសិស្ស លុះទៅដល់អាហារដ្ឋានដែលស្ថិតនៅចំណុចក្រុមទី៣ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ក៏ឈប់ម៉ូតូចតនៅខាងក្រៅអាហារដ្ឋាន ដើម្បីស្រស់ស្រូបអាហារពេលព្រឹក ។ ពេលបរិភោគរួចចេញមកវិញស្រាប់តែបាត់ម៉ូតូក៏បានទៅដាក់ពាក្យបណ្តឹងនៅនគរបាលប៉ុស្តិ៍រដ្ឋបាលសង្កាត់ភ្នំពេញថ្មី ដើម្បីឱ្យជួយអន្តរាគមន៍។ លុះមកដល់ថ្ងៃទី១៨ កក្កដា ការិយាល័យជំនាញកងរាជអាវុធហត្ថខេត្តព្រះសីហនុ ទទួលបានសេចក្តីរាយការណ៍ពីប្រជាពលរដ្ឋដែលដើរស្ទួចត្រីហើយប្រទះឃើញម៉ូតូដែលមានភិនភាគខាងលើត្រូវបានគេយកទៅប្លុងចោលក្នុងព្រៃអាកាស្យាក្បែរអាងស្តុកចំរោះទឹកស្អាត ស្ថិតនៅក្រុមទី៧ ភូមិ៤ សង្កាត់លេខ៤ ក្រុងព្រះសីហនុ ។
លោកនាយការិយាល័យស្រាវជ្រាវបទល្មើសនៃបញ្ជាការដ្ឋានកងរាជអាវុធហត្ថខេត្ត បានបញ្ជាក់ថា ដោយទទួលបានបទបញ្ជាពីលោកឧត្តមសេនីយ៍ត្រីហ៊ាង និន មេបញ្ជាការកងរាជអាវុធហត្ថខេត្តព្រះសីហនុ ពេលនោះលោកក៏បញ្ជាកម្លាំងជំនាញចំនួន៤នាក់ ចុះទៅគោលដៅខាងលើយកម៉ូតូមករក្សាទុកនៅទីបញ្ជាការកងរាជអាវុធហត្ថខេត្តព្រះសីហនុ ។ ឆ្លងតាមការស្រាវជ្រាវអំពីលេខតួ លេខម៉ាស៊ីនទៅលើសាខាក្រុមហ៊ុន NCX នៅតាមបណ្តាខេត្តនានា ជាលទ្ធផលបង្ហាញឱ្យឃើញថា ម៉ូតូដែលមានភិនភាគខាងលើជាកម្មសិទ្ធិរបស់ឈ្មោះ យែ៉ម ហ៊ាង មានស្រុកកំណើតនៅខេត្តតាកែវ ៕
ចែករំលែកព័តមាននេះ