ខេត្តតាកែវ ៖ វិស័យគមនាគមន៍ជាវិស័យមួយដែលមានសារសំខាន់ជាងគេ ព្រោះបើគ្មានវិស័យគមនាគមន៍ទេយើងមិនអាចធ្វើការដឹកជញ្ជូនផលិតផលផ្សេងៗពីតំបន់មួយទៅតំបន់មួយបានដែរ ។ ស្ទឹងអង្គរបុរី ត្រូវបានអ្នកស្រុកចាត់ទុកជាសរសៃឈាមសេដ្ឋកិច្ចសម្រាប់ស្រុកអង្គរបុរីទាំងមូល ដោយសារស្ទឹងនេះមានកំពង់ផែមួយសម្រាប់ធ្វើចរាចរទំនិញចែកចាយទៅតំបន់ផ្សេងពិសេសគឺដឹកជញ្ជូនស្រូវនិងបានបង្កើតការងារសម្រាប់ពលរដ្ឋក្នុងតំបន់នេះ ។
ឡាច ហុន ជាកម្មករម្នាក់ក្នុងចំណោមកម្មករលីបាវស្រូវប្រចាំនៅកំពង់ផែអង្គរបុរីបានបង្ហើបឱ្យដឹងថា គាត់លីបាវស្រូវឡើងទូកនៅទីនេះរាល់ថ្ងៃដែលក្នុងមួយថ្ងៃអាចរកចំណូលបានចាប់ពី៤០.០០០រៀលទៅ៤៥.០០០រៀល ពីការលីបាវស្រូវ ។ ហុន បានបន្តទៀតថា ការលីបាវស្រូវនេះមិនមែនលីតែម្នាក់ឯងនោះទេ គឺគាត់លីជាក្រុមដែលក្រុមរបស់គាត់មានសមាជិកចំនួន១០០នាក់និងមានមេក្រុមម្នាក់ដើម្បីទាក់ទងម៉ៅការលីបាវស្រូវតាមរថយន្តនីមួយៗដែលក្នុងមួយតោនបានតម្លៃ៦.០០០រៀល ។
សូជាកម្មករម្នាក់ក្នុងចំណោមកម្មករទាំងនោះមានស្រុកកំណើតនៅភូមិអង្គរបុរី ឃុំព្រែកផ្ទោល ស្រុកអង្គរបុរី ខេត្តតាកែវ បានប្រាប់ថា រាល់ថ្ងៃគាត់តែងតែលីបាវស្រូវឬទំនិញចេញ-ចូលឡើងចុះដាក់ក្នុងទូកដែលអាចទទួលបានចំណូលខ្លះសម្រាប់ដោះស្រាយជីវភាពគ្រួសារប្រចាំថ្ងៃ ។ សូ បន្តទៀតថា ប្រសិនបើគ្មានកំពង់ផែអង្គរបុរីនេះទេនោះគាត់មិនដឹងថា រកប្រាក់ឯណាដើម្បីផ្គត់ផ្គង់ជីវភាពគ្រួសារឡើយ ព្រោះវាជាការងារមួយដែលមានទីតាំង នៅជិតផ្ទះដែលអាចមានពេលវេលាខ្លះទៀតសម្រាប់ជួយដល់ការងារផ្ទះបានច្រើនក្រៅពីការជញ្ជូនទំនិញដាក់ទូក ហើយអ្វីដែលប្រសើរនោះគឺមិនបាច់ចំណាយដើមទុន គឺចំណាយកម្លាំងតែមួយរយៈពេលប៉ុណ្ណោះ ។ យោងតាមការរៀបរាប់របស់លោកវ៉ា ជាឈ្មួញទិញស្រូវបានឱ្យដឹងថា គាត់តែងតែមកទិញស្រូវនៅកំពង់ផែស្ទឹងអង្គរបុរីនេះជាញឹកញាប់ហើយចំពោះការជញ្ជូនទំនិញចេញចូលក្នុងទូកគឺត្រូវតែជួលកម្មករដែលប្រចាំការនៅទីនេះតែម្តង ។
លោកជ្រី ជាស្នៀនឃុំអង្គរបុរីបានគូសបញ្ជាក់ថា កំពង់ផែស្ទឹងអង្គរបុរីនេះ ប្រៀបបីដូចជាសរសៃឈាមយ៉ាងសំខាន់មិនមែនសម្រាប់តែស្រុកអង្គរបុរីប៉ុណ្ណោះទេ តែក៏សម្រាប់បណ្តាស្រុកមួយចំនួនទៀតនៅតាមដងស្ទឹងអង្គរបុរីនេះផងដែរ ។ លោកបន្ថែមទៀត ថា កំពង់ផែនេះជាកន្លែងនាំចេញនាំចូលនូវផលិតផលទាំងក្នុងស្រុកនិងក្រៅស្រុកហើយអាចបង្កើតការងារដល់ប្រជាពលរដ្ឋដែលរស់នៅ ជិតៗតំបន់នេះបានយ៉ាងច្រើន ៕
ចែករំលែកព័តមាននេះ