រាជធានីភ្នំពេញ ៖ សភាសម្ព័ន្ធសហជីពជាតិកម្ពុជា និងសមាគមយុវជនកម្ពុជា បានចេញសេចក្តីថ្លែងការណ៍រៀងៗខ្លួននៅថ្ងៃទី១០សីហា បង្ហាញនូវការគាំទ្រការបកស្រាយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្តីពីបញ្ហាព្រំដែននៅរដ្ឋសភា កាលពីថ្ងៃទី៩ សីហា ។
សេចក្តីថ្លែងការណ៍របស់សភាសម្ព័ន្ធសហជីពជាតិកម្ពុជាបានសរសេរថា យើងខ្ញុំជាសមាជិកក្រុមប្រឹក្សាភិបាល នៃសភាសម្ព័ន្ធសហជីពកម្ពុជា (NACC) បានតាមដានយ៉ាងយកចិត្តទុកដាក់ចំពោះការបកស្រាយរបស់សម្តេចតេជោនាយករដ្ឋមន្រ្តីពាក់ព័ន្ធទៅនឹងបញ្ហាព្រំដែនប្រទេសកម្ពុជា ជាមួយនឹងប្រទេសជិតខាង តាមសំណើសុំឆ្លើយបំភ្លឺរបស់តំណាងរាស្ត្របក្សប្រឆាំង ។
ការបកស្រាយបំភ្លឺរបស់សម្តេចតេជោរយៈពេលជាង៥ម៉ោង បានធ្វើឱ្យយើងទាំងអស់គ្នា ជាថ្នាក់ដឹកនាំសហជីពគ្រប់ជាន់ថ្នាក់ កម្មករ និយោជិត ក៏ដូចប្រជាពលរដ្ឋទូទាំងប្រទេស បានយល់កាន់តែច្បាស់អំពីបញ្ហាជាសារវន្តពាក់ព័ន្ធទៅនឹងព្រំដែនជាមួយប្រទេសជិតខាង។
ការបកស្រាយរបស់សម្តេចតេជោនាយករដ្ឋមន្ត្រី បានបង្ហាញឱ្យឃើញយ៉ាងច្បាស់នូវការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងកិច្ចការពារបូរណភាពដែនដី ដោយអនុវត្តនូវគោលនយោបាយបន្តវេនពីអតីតព្រះមហាវីរក្សត្រនរោត្តម សីហនុ គឺយោងតាមផែនទីដែលបានយកទៅតម្កល់នៅអង្គការសហប្រជាជាតិនៅឆ្នាំ១៩៦៤ ។ ដូចនេះ បញ្ហាព្រំែដន គឺជាបញ្ហាមត៌កប្រវត្តិសាស្រ្ត ហើយរាជរដ្ឋាភិបាលកម្ពុជាបច្ចុប្បន្នបានបំពេញនូវបេសកកម្មដើម្បីការពារមត៌កនេះ ការពារបូរណភាពដែនដី ក្នុងនាមជាប្រទេសឯករាជ្យ និងអធិបតេយ្យពេញលេញ ប្រកបដោយវីរភាពដ៏ខ្ពង់ខ្ពស់មិនអាចកាត់ថ្លៃបាន ។
ព្រឹត្តិការណ៍ជាប្រវត្តិសាស្ត្រនេះ បានជម្រះនូវភាពស្រពេចស្រពឹលចំពោះបញ្ហាទាំងឡាយ ពាក់ព័ន្ធនឹងគំនូសព្រំដែន ក៏ដូចជាការបោះបង្គោលព្រំដែនជាមួយបណ្តាប្រទេសជិតខាងដែលក្រុមគណបក្សប្រឆាំងបានយកធ្វើជាប្រធានបទសម្រាប់ធ្វើអាជីវកម្មនយោបាយ និងបានចោទប្រកាន់មកលើរាជរដ្ឋាភិបាលនាពេលកន្លងមកថា បានធ្វើឱ្យបាត់ដីដោយសារការបោះបង្គោលព្រំដែននោះ ត្រូវបានសម្តេចតេជោ ហ៊ុន សែន បញ្ជាក់យ៉ាងច្បាស់ថា គ្មានការបាត់បង់ទឹកដី សូម្បីតែមួយមីលី្លម៉ែត្រ ។
យើងខ្ញុំទាំងអស់គ្នា សូមគាំទ្រយ៉ាងពេញទំហឹង ចំពោះការបកស្រាយបំភ្លឺរបស់សម្តេចតេជោ នាយករដ្ឋមន្រ្តីស្តីពីបញ្ហាព្រំដែន កាលពីថ្ងៃទី៩ សីហា ឆ្នាំ២០១២ នៅរដ្ឋសភា និងសូមគាំទ្រនូវគំរូវីរភាពរបស់សម្តេចតេជោ ដែលមានឆន្ទៈមោះមុតក្នុងបុព្វហេតុការពារទឹកដី និងប្រជាជន ។
ចំណែកសមាគមយុវជនកម្ពុជា បានសម្តែងនូវអំណរគុណយ៉ាងជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានធ្វើការបកស្រាយយ៉ាងក្បោះក្បាយអំពីការពិតនៃប្រវត្តិសាស្រ្ត ពាក់ព័ន្ធនឹងដំណើរការនៃការងារបោះបង្គោលខណ្ឌសីមាព្រំដែនគោក និងការកំណត់ព្រំដែនសមុទ្ររវាងព្រះរាជាណាចក្រកម្ពុជានិងសាធារណរដ្ឋសង្គមនិយមវៀតណាម។ យើងខ្ញុំជាយុវជនទាំងអស់ពិតជាបានជ្រួតជ្រាបយ៉ាងច្បាស់អំពីតថភាពនៃបញ្ហាព្រំដែន ទាំងកត្តាប្រវត្តិសាស្រ្ត ទិដ្ឋភាពច្បាប់ និងស្ថានភាពជាក់ស្តែងនៃការរស់នៅរបស់ប្រជាពលរដ្ឋ នៅតាមបណ្តោយព្រំដែននាពេលបច្ចុប្បន្ន ។
សេចក្តីថ្លែងការណ៍នេះបន្តថា សមាគមយុវជនកម្ពុជា ពិតជាមានមោទនភាពជាទីបំផុតចំពោះទឹកចិត្តស្នេហាជាតិ និងជំហរដ៏មោះមុតបំផុតរបស់សម្តេចតេជោនាយករដ្ឋមន្ត្រីក្នុងបុព្វហេតុជាតិមាតុភូមិ ជាពិសេសកិច្ចខិតខំការពារ និងថែរក្សាបូរណភាពទឹកដី និងអធិបតេយ្យភាពនៃព្រះរាជាណាចក្រកម្ពុជា ។ ជាមួយគ្នានេះដែរ សមាគមយុវជនកម្ពុជាក៏សូមសម្តែងការគោរព និងកោតសរសើរចំពោះពលិកម្ម និងការលះបង់អស់ពីកម្លាំងកាយ-ចិត្ត និងប្រាជ្ញាស្មារតីរបស់ប្រជាពលរដ្ឋកម្ពុជា នៅក្នុងបេសកកម្មដ៏ឧដុង្គឧត្តមនេះ ។
សមាគមយុវជនកម្ពុជា សូមអំពាវនាវឱ្យមានការបន្តផ្សព្វផ្សាយអប់រំខ្លឹមសារនៃការបកស្រាយអំពីបញ្ហាព្រំដែននេះឱ្យបានកាន់តែទូលំទូលាយ និងស៊ីជម្រៅបន្ថែមទៀត សំដៅលើកកម្ពស់ការយល់ដឹងអំពីការពិតនៃប្រវត្តិសាស្រ្តពាក់ព័ន្ធនឹងបញ្ហាព្រំដែនកម្ពុជា ជាមួយប្រទេសជិតខាង ៕
ចែករំលែកព័តមាននេះ