ខេត្តបាត់ដំបង ៖ សមត្ថកិច្ចបានឃាត់ខ្លួនបុរស២នាក់ កាលពីព្រឹកថ្ងៃទី៨ សីហា នៅភូមិព្រៃលាវ ឃុំបន្សាយត្រែង ស្រុកថ្មគោល ក្រោយពីអាជ្ញាធរសង្ស័យនិងរាយការណ៍ថា បុរស២នាក់នេះអះអាងថា ខ្លួនជាឯកឧត្តម និងជាខ្សែរយៈលោកជំទាវមួយរូបបានទៅបំផុសឲ្យប្រជាពលរដ្ឋទៅចែកដីនៅខេត្តព្រះវិហារ និងព្យាយាមទារប្រាក់ពីប្រជាពលរដ្ឋទៀត។
មន្ត្រីសមត្ថកិច្ចប្រាប់ថា ជនទាំង២នាក់នេះម្នាក់ឈ្មោះតាំង វ៉ាន់ធៀង ហៅរ៉េត អាយុ៥០ឆ្នាំ នៅភូមិបាលិលេយ្យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ជននេះអះអាងថាខ្លួនមានឋានៈជាឯកឧត្តមនិងអះអាងទៀតថា ជាខ្សែលោកជំទាវមួយរូប តែប្រាប់សមត្ថកិច្ចថា ខ្លួនមិនចេះអក្សរទេ និងម្នាក់ទៀតឈ្មោះគង់ កែវ អាយុ៤០ឆ្នាំ នៅភូមិស្ទឹងបត់ សង្កាត់ផ្សារកណ្ដាល ក្រុងប៉ោយប៉ែត ជាអ្នករួមដំណើរ។ ពួកគេជិះរថយន្តម៉ាកឡង់គ្រីស្ស័រពណ៌ប្រផេះ ពាក់ស្លាកលេខភ្នំពេញ2F-5310។ ជនទាំង២នាក់នេះ ត្រូវសមត្ថកិច្ចស្រុកថ្មគោលឃាត់ខ្លួនដោយយោងតាមសេចក្ដីរាយការណ៍របស់អាជ្ញាធរស្រុកថ្មគោល ក្នុងគ្រាដែលពួកគេកំពុងអង្គុយប្រូប្រាជ្ញបំផុសឲ្យប្រជាពលរដ្ឋទៅចែកដីនៅខេត្តព្រះវិហារ។ អ្វីដែលគួរឱ្យកត់សម្គាល់គឺជនទាំង២នាក់មានចរិតរឹងរួស និងបានដំឡើងសរសៃកយ៉ាងចាស់ដៃ ពេលដែលសមត្ថកិច្ចចុះទៅអញ្ជើញពួកគេឲ្យទៅបំភ្លឺនៅស្នាក់ការ ហើយសូម្បីតែចម្លើយមួយម៉ាត់ក៏ជនទាំង២នាក់នេះមិនខ្ចីឆ្លើយបំភ្លឺទៅនឹងសំណួររបស់សមត្ថកិច្ចដែរ ។
តាមរបាយការណ៍របស់លោកសម ណេង អភិបាលស្រុកថ្មគោលឲ្យដឹងថា នៅព្រឹកថ្ងៃទី៨ សីហា នោះ លោកធុន ឡម មេឃុំបន្សាយ ត្រែងបានរាយការណ៍មកលោកអំពីសកម្មភាពជនទាំង២នាក់ដើរបំផុសប្រជាពលរដ្ឋឲ្យទៅចែកដីនៅខេត្តព្រះវិហារ។ លោក បញ្ជាក់ថា ពួកគេអះអាងថា ខ្លួនជាឯកឧត្តម និងជាខ្សែលោកជំទាវមួួយរូបទៀតផង ។ ដោយមានការសង្ស័យ ទើបលោករាយការណ៍បន្តទៅលោកអ៊ុយ រី អភិបាលរងខេត្ត ហើយលោកអភិបាលរងខេត្តក៏បញ្ជាឲ្យអាជ្ញាធរមូលដ្ឋាន និងសមត្ថកិច្ចចុះស្រាវជ្រាវឃាត់ខ្លួនជនទាំង២នាក់នេះនាំមកកាន់អធិការដ្ឋាននគរបាលស្រុកដើម្បីសួរនាំ ។
លោកមៀន ឡាយ នាយការិយាល័យនគរបាលព្រហ្មទណ្ឌកម្រិតស្រាលខេត្តបានឲ្យដឹងដែរថា ជនទាំង២នាក់នេះមិនបំភ្លឺទាល់តែសោះជុំវិញសកម្មភាពខាងលើរបស់ខ្លួន ប៉ុន្តែបាននិយាយអំពីការធ្វើដំណើររបស់ពួកគេចូលទៅកាន់ភូមិព្រៃលាវ ឃុំបន្សាយត្រែង ។ ក្នុងកំណត់ហេតុសួរចម្លើយជនឈ្មោះតាំង វ៉ាន់ធៀង ហៅរ៉េត ដែលអះអាងថាខ្លួនជាឯកឧត្តម និងខ្សែលោកជំទាវមួយរូបនិយាយថា គោលដៅរបស់ខ្លួនគឺទៅកាន់«ឡែម»ស្រុកកំរៀង។ ប៉ុន្តែពេលបើករថយន្តដល់ឃុំបន្សាយត្រែង ឈ្មោះគង់ កែវ បានប្រាប់ឲ្យខ្លួនបើករថយន្តចូលទៅលេងផ្ទះបងប្អូនគេនៅភូមិព្រៃលាវ ។ ជននេះនិយាយថា ពេលចូលទៅដល់ផ្ទះបងប្អូនរបស់គង់ កែវ ខ្លួនបានចូលអង្គុយលើអង្រឹងបានបន្តិច ស្រាប់តែឃើញមន្ត្រីសមត្ថកិច្ច៨នាក់ចូលទៅដល់ ហើយអញ្ជើញខ្លួនឲ្យទៅកាន់អធិការដ្ឋានស្រុក ដោយប្រាប់ថា ជាបទបញ្ជារបស់លោកអធិការ ។ ជននេះនិយាយទៀតថា ពេលនោះខ្លួនបានប្រកែកមិនព្រមទៅ ព្រោះមិនដឹងថា មានរឿងអី? លុះបន្តិចក្រោយមកមានលោកអធិការរងម្នាក់មកដល់ពួកខ្លួនក៏ព្រមទៅតាម។ នៅអធិការដ្ឋានស្រុកសមត្ថកិច្ចប្រាប់ថា មានគេប្ដឹងពួកខ្លួន ហើយខ្លួនបានស្នើឲ្យសមត្ថកិច្ចអានបណ្ដឹងនោះ ព្រោះខ្លួនមិនចេះអក្សរ តែសមត្ថកិច្ចមិនបានអានទេ ដូច្នេះហើយទើបខ្លួនមិនឆ្លើយនឹងសំណួររបស់សមត្ថកិច្ច សូម្បីមួយម៉ាត់ក្ដី ។
បើទោះជាជនទាំង២នាក់នេះរឹងរូសមិនឆ្លើយក្ដី ក៏នៅក្នុងរបាយការណ៍របស់លោកសម ណេង អភិបាលស្រុកថ្មគោលបញ្ជាក់ថា ជនទាំង២នាក់នេះបានឃោសនាប្រាប់ប្រជាពលរដ្ឋនៅភូមិព្រៃលាវថា នៅខេត្តព្រះវិហារមានគេចែកដីក្នុង១គ្រួសារបានទំហំ៥ហិកតា បើប្រជាពលរដ្ឋណាចង់បានដីត្រូវយកអត្តសញ្ញាណប័ណ្ណឲ្យរូបគេ និងត្រូវបង់ប្រាក់ចំនួន១២០ដុល្លារមុន ហើយនឹងត្រូវបង់បន្ថែមចំនួន១.០០០ដុល្លារទៀត ក្រោយពីទទួលបានចំណែកដីស្របច្បាប់។ លោកអភិបាលស្រុកបន្ថែមថា ក្រោយពីទទួលបានព័ត៌មាននេះ និងខ្លាចប្រជា ពលរដ្ឋចាញ់បោកគេដូចនៅតំបន់«អណ្ដូងកន្ទូត»ស្រុកគាស់ក្រឡ ទើបលោករាយការណ៍ជូនអាជ្ញាធរខេត្តនិងមានបញ្ជាឲ្យឃាត់ខ្លួនពួកគេសួរនាំតែម្ដងទៅ ។
លោកមៀន ឡាយ នាយការិយាល័យព្រហ្មទណ្ឌកម្រិតស្រាលខេត្តបានបញ្ជាក់ដែរថា ជនទាំង២នាក់នេះមិនសារភាពទេ នៅពេលសមត្ថកិច្ចសួរនាំពីរឿងអំពើ«ឆបោក» និងពាក់ព័ន្ធថា ខ្លួនជាឯកឧត្តម ឬខ្សែលោកជំទាវនោះ ដោយគ្រាន់តែនិយាយថា ពួកគេគ្រាន់តែចូលលេងផ្ទះបងប្អូននៅភូមិព្រៃលាវប៉ុណ្ណោះ។ ទោះជាយ៉ាងណា ដោយយោងតាមបទបញ្ជារបស់លោកស្នងការ និងលោកព្រះរាជអាជ្ញាអមសាលាដំបូងខេត្តលោកបានកសាងសំណុំរឿងបញ្ជូនជនសង្ស័យទាំង២នាក់ទៅកាន់តុលាការហើយ ៕
ចែករំលែកព័តមាននេះ