ខេត្តព្រះសីហនុ ៖ អគាររង់ចាំរបស់មណ្ឌលសុខភាពអូរជ្រៅ ស្ថិតនៅឃុំអូរជ្រៅ ស្រុកព្រៃនប់ ដែលបានចំណាយថវិកាក្នុងការសាងសង់ប្រមាណជា៨ម៉ឺនដុល្លារដែលជាជំនួយរបស់សហរដ្ឋអាមេរិក និងជាផ្នែកមួយនៃបេសកកម្មភាពជាដៃគូនៅតំបន់ប៉ាស៊ីហ្វិកនៅប្រទេសកម្ពុជា ត្រូវបានសម្ពោធដាក់ឲ្យប្រើប្រាស់ជាផ្លូវការកាលពីព្រឹកថ្ងៃទី១០ សីហា ២០១២ ។
លោកវរនាវាឯក ចេម ម៉ូហ្គេន មេបញ្ជាការបេសកកម្មភាពជាដៃគូនៅតំបន់ប៉ាស៊ីហ្វិកបានមានប្រសាសន៍ឲ្យដឹងថា អគាររង់ចាំដែលសម្ពោធដាក់ឲ្យប្រើប្រាស់នៅពេលនេះបានសាងសង់អស់រយៈពេល៣៣ថ្ងៃដោយកងទ័ពជើងទឹកអាមេរិក និងមានការចូលរួមពីកងវិស្វកម្មកម្ពុជាផងដែរ។ លោកវរនាវាឯក បានប្រាប់ពីគោលបំណងនៃការជួសជុលអគារនេះថា គឺដើម្បីពង្រឹងទំនាក់ទំនងកិច្ចសហប្រតិបត្តិការ និងពង្រីកចំណេះដឹងរវាងកងទ័ពនៃប្រទេសទាំងពីរកម្ពុជា និងសហរដ្ឋអាមេរិក។
លោកស្រីប្រាក់ ច័ន្ទសុខា អភិបាលរងខេត្តបានមានប្រសាសន៍ថា ការសម្ពោធអគាររង់ចាំរបស់មណ្ឌលសុខភាពអូរជ្រៅនាពេលនេះគឺជាសមិទ្ធផលថ្មីមួយសម្រាប់ផ្តល់សេវាពិនិត្យថែទាំ និងព្យាបាលជំងឺ ជាពិសេសលើផ្នែកសុខភាពមាតា និងទារកដែលជាផ្នែកមួយសម្រាប់ប្រជាពលរដ្ឋ ក្នុងឃុំអូរជ្រៅ ស្រុកព្រៃនប់ នេះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ