ខេត្តកំពង់ចាម ៖ រថយន្តមិនស្គាល់ម៉ាក១គ្រឿងចំណុះប្រហែល៥តោន ដឹកទំនិញសំពីងសំពោងបានបើកទៅបុកស្លាកសញ្ញាព្រួញប្រាប់ទិស ធ្វើពីដែកដាច់ចេញពីបំពង់ទីប និងកិនបែកការូឡាខ្ទេចមួយចំនួន ថែមទាំងកិនដើមផ្កាចម្រុះពណ៌ ខូចខាតខ្ទេចលើសួនច្បាប់រជាប់នឹងរង្វង់មូលនាគព័ន្ធ ។
ហេតុការណ៍នេះ បានកើតឡើងនៅភូមិបឹងស្នាយសង្កាត់សំបួរមាសក្រុងកំពង់ចាម កាលពីវេលាម៉ោង៣រំលងអធ្រាត្រ ឈានចូលថ្ងៃទី១០ សីហា ២០១២ ។ បន្ទាប់ពីកើតហេតុរថយន្តបង្កបានបើករត់គេចបាត់ស្រមោល ហើយត្រូវបានកម្លាំងកងរាជអាវុធហត្ថខេត្ត ជាម្ចាស់សួនច្បារកំពុងស្រាវជ្រាវ តាមរកផងដែរ ។
សាក្សីនៅកន្លែងកើតហេតុ ប្រាប់ឱ្យកោះសន្តិភាពដឹងថា ក្នុងពេលដែលកំពុងតែដេកលង់លក់ ក៏ស្រាប់តែឮសូរសំឡេងបុកជាខ្លាំងនៅខាងមុខផ្ទះលើផ្លូវជាតិលេខ៧ ធ្វើឱ្យប្រជាពលរដ្ឋរស់នៅក្បែរនោះ នាំគ្នាអើតមើលតាមប្រឡោះទ្វារ ក៏ឃើញរថយន្ត១គ្រឿងធុនធំ បុកស្លាកសញ្ញាប្រាប់ទិសឡើងវៀចរបូតដាច់ និងកិនផ្កាលើសួនខ្ទេច ។ តែសំណាងល្អមិនបានទៅបុករង្វង់មូលនាគព័ន្ធនោះទេ ។
សាក្សីប្រាប់បន្តថា ភ្លាមៗរថយន្តធុនធំដឹកទំនិញ មិនបានឈប់នៅមើលនោះទេ ហើយក៏មិនឃើញកម្លាំងសមត្ថកិច្ចណាម្នាក់ចុះឃាត់រថយន្តនេះដែរ គឺអ្នកបើកបរបានព្យាយាមបើករថយន្តបួងចង្កូតទៅខាងស្តាំដៃ ហើយបន្តដំណើរទៅមុខទៀតបាត់ស្រមោល ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង
ចែករំលែកព័តមាននេះ