ខេត្តកំពង់ចាម ៖ ប្រជាពលរដ្ឋក្រុងកំពង់ចាម ភាគច្រើនមិនសប្បាយចិត្តដោយសារតែសំរាមរបស់ពួកគាត់ដាក់នៅខាងមុខផ្ទះ មិនត្រូវបានក្រុមហ៊ុនស៊ិនទ្រី ចុះមកប្រមូលយកឱ្យបានឆាប់ៗនោះទេ ទាល់តែមានដង្កូវចោះជិតក្លិនស្អុយអសោច ទើបគេឃើញរថយន្តប្រមូលសំរាមមកដឹកយកទៅចាក់ចោល ។ លោកធុច ថាត អភិបាលក្រុងកំពង់ចាម មានប្រសាសន៍ឱ្យកោះសន្តិភាពដឹងនៅព្រឹកថ្ងៃទី១០ សីហា ២០១២ ថា ការយឺតយាវនៃការប្រមូលសំរាមនេះ គឺដោយសារតែមានវិបត្តិទីតាំងសម្រាប់ចាក់សំរាម ព្រោះមុននេះត្រូវដឹកយកទៅចាក់ចោលនៅខាងភូមិស្រែសៀម ឃុំជីរោទិ៍ទី២ ស្រុកត្បូងឃ្មុំ តែដោយគំនរសំរាមធំខ្វះលក្ខណៈបច្ចេកទេស ទើបជាហេតុបណ្តាលឱ្យជះក្លិនស្អុយត្រូវបានប្រជាពលរដ្ឋរស់នៅតំបន់នោះនាំគ្នាប្តឹងជំទាស់មិនឱ្យចាក់នៅទីនោះឡើយ ។
លោកធុច ថាត បន្តថា ការផ្លាស់ប្តូរទីតាំងកន្លែងថ្មីសម្រាប់ចាក់សំរាមមិនទាន់ពេលវេលាទើបជាហេតុ បណ្តាលឱ្យការប្រមូលសំរាមមានការយឺតយាវ ដូច្នេះហើយទើបធ្វើឱ្យប្រជាពលរដ្ឋរស់នៅក្នុងក្រុងកំពង់ចាម មានការមិនសប្បាយចិត្ត។ ប្រសិនបើក្រុមហ៊ុនស៊ិនទ្រី នូវតែបណ្តោយឱ្យកើតមានបែបនេះបន្តទៀត នឹងមានបញ្ហាចោទឡើង ហើយពេលចុះទៅប្រមូលលុយថ្លៃសំរាមប្រាកដជាត្រូវប្រជាពលរដ្ឋមិនឱ្យលុយ។ ជាមួយនោះដែរលោកធុច ថាត បានជំរុញឱ្យក្រុមហ៊ុនប្រមូលសំរាមត្រូវតែរៀបចំទិន្នន័យប្រមូលសំរាមឱ្យបានច្បាស់លាស់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ