រាជធានីភ្នំពេញ ៖ ដោយសារមានឈាមជ័រជាអ្នកសិល្បៈលោកសាំង សុណាលីដូ ក្នុងវ័យ២៤ឆ្នាំ ត្រូវជាចៅយាយចេកម៉ាចបានបណ្តែតខ្លួនចូលក្នុងវិស័យសិល្បៈរបាំបុរាណ របាំប្រពៃណី និងចូលហ្វឹកហាត់រៀនរាំច្រៀងនៅក្នុងអង្គការក្រៅរដ្ឋាភិបាលមួយនាឆ្នាំ២០០២ ។
លោកសាំង សុណាលីដូ បានរៀបរាប់ពីជីវិតសិល្បៈឱ្យដឹងថា លោកមានជីដូន (យាយចេកម៉ាច) ជាអ្នកសិល្បៈល្ខោនបាសាក់ និងម្តាយជាអ្នកចម្រៀង និងអ្នកនិពន្ធទំនុកបទចម្រៀងផងនោះ បានធ្វើឱ្យលោកមានដុងនិស្ស័យសិល្បៈពីកំណើតមក និងបានខិតខំហ្វឹកហាត់រៀនរាំរបាំជាច្រើនទម្រង់ ដូចជារបាំប្រពៃណី មានរបាំគោះត្រឡោក របាំនេសាទ របាំគោះអង្រែ របាំវាយក្រាប់ របាំក្ងោកប៉ៃលិន របាំបេះក្រវ៉ាញ របាំហ្គែនជាដើម ។ ចំណែករបាំបុរាណលោកសាំង សុណាលីដូ ចេះមានដូចជារបាំទេពមនោរម្យ របាំជូនពរ របាំមេខឡា របាំអប្សរា របាំទេពមច្ឆា និងរបាំជាច្រើនទៀត។
លោកសាំង សុណាលីដូ បន្តថា ក្រៅពីចេះរាំរបាំបុរាណ និងប្រពៃណីលោកក៏ចេះច្រៀងចម្រៀងសម័យ និងមហោរីផងដែរ។ ដោយសារតែលោកមានជំនាញច្រើនបែបនេះ ទើបកន្លងមកក្រៅពីសម្តែងរាំរបាំ និងច្រៀងជាកិត្តិយសនៅ ក្នុងកម្មវិធីផ្សេងៗថ្នាក់ជាតិ និងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានានោះ លោកក៏ធ្លាប់បានចេញទៅសម្តែងរាំច្រៀងនៅលើឆាកអន្តរជាតិតាមបណ្តាប្រទេសមួយចំនួនដូចជាប្រទេសអង់គ្លេស បារាំង និងសហរដ្ឋអាមេរិកទៀតផង ។ នៅចុងឆ្នាំ២០១២ នេះ លោកនឹងចេញទៅសម្តែងច្រៀង រាំរបាំ និងធ្វើជាមេប្រយោគផ្តល់ពិន្ទុដល់កូនខ្មែរដែលរស់នៅឯប្រទេសអូស្ត្រាលីក្នុងការប្រឡងច្រៀង និងរាំផងដែរ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ