ខេត្តបាត់ដំបង ៖ បុរស២នាក់ត្រូវសមត្ថកិច្ចចាប់ឃាត់ខ្លួនកាលពីព្រឹកថ្ងៃទី៨ សីហា ២០១២ នៅភូមិព្រៃលាវ ឃុំបន្សាយត្រែង ស្រុកថ្មគោល ក្រោយពីអាជ្ញាធរសង្ស័យ និងរាយការណ៍ថា បុរស២នាក់នេះអះអាងថា ខ្លួនជាឯកឧត្តម និងជាខ្សែរយៈលោកជំទាវកិត្តិព្រឹទ្ធិបណ្ឌិតប៊ុន រ៉ានី ហ៊ុន សែន បានទៅបំផុសឲ្យប្រជាពលរដ្ឋទៅចែកដីនៅខេត្តព្រះវិហារ របៀបបោកប្រាស់ និងព្យាយាមទារប្រាក់ពីប្រជាពលរដ្ឋទៀត។
សមត្ថកិច្ចប្រាប់ថា ជនទាំង២នាក់នេះ ១-ឈ្មោះតាំង វ៉ាន់ធៀង ហៅរ៉េត ភេទប្រុស អាយុ៥០ឆ្នាំ មានទីលំនៅភូមិប៉ាលិឡៃ សង្កាត់ប៉ោយប៉ែត ក្រុងប៉ោយប៉ែត ជននេះថា ខ្លួនមានឋានៈជាឯកឧត្តម និងអះអាងទៀតថា ជាខ្សែលោកជំទាវកិតិ្តព្រឹទ្ធិបណ្ឌិត ប៊ុន រ៉ានី ហ៊ុន សែន តែប្រាប់សមត្ថកិច្ចថា ខ្លួនមិនចេះអក្សទេ។ ២-ឈ្មោះគង់ កែវ ភេទប្រុស អាយុ៤០ឆ្នាំ មានទីលំនៅនៅភូមិស្ទឹងបត់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ជាអ្នករួមដំណើរពួកគេជិះរថយន្តម៉ាកឡង់គ្រីស្ស័រ ពណ៌ប្រផេះ។ ជនទាំង២នាក់នេះត្រូវសមត្ថកិច្ចស្រុកថ្មគោលចាប់ឃាត់ខ្លួន ដោយយោងតាមសេចក្ដីរាយការណ៍របស់អាជ្ញាធរស្រុកថ្មគោល ខណៈពួកគេកំពុងអង្គុយប្រូប្រាជ្ញបំផុសឲ្យប្រជាពលរដ្ឋទៅចែកដីនៅខេត្តព្រះវិហារ។ ជនសង្ស័យទាំង២នាក់នេះមានចរឹកវិនាសរឹងរូស និងបានតំឡើងសរសៃ.កយ៉ាងចាស់ដៃ ពេលដែលសមត្ថកិច្ចចុះទៅអញ្ជើញពួកគេឲ្យទៅបំភ្លឺនៅស្នាក់ការ។ សូម្បីតែចម្លើយមួយម៉ាត់ក៏ជនទាំង២នាក់នេះមិនខ្ចីឆ្លើយបំភ្លឺទៅនឹងសំនួរសមត្ថកិច្ចដែរជុំវិញបញ្ហានេះ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ