ពួកឧទ្ទាមស៊ីរីកាលពីថ្ងៃទី៩ សីហា បានដកថយចេញពីសង្កាត់សំខាន់ដែលពួកគេត្រួតត្រានៅទីក្រុងអាឡែបជាទីក្រុងធំទី២របស់ប្រទេសហើយជាទីក្រុងគន្លឹះនៃជម្លោះរវាងពួកបះបោរនិងរបបលោកប្រធានាធិបតីបាចាអាល់ អាសាដ ។ ចំណែកប្រធានាធិបតីស៊ីរីបានតែងតាំងនាយករដ្ឋមន្ត្រីថ្មីដើម្បីជំនួសលោករីយ៉ាដ ហុីចាប ដែលរត់ចោលជួរនាសប្តាហ៍នេះ ។ ទន្ទឹមនឹងនេះអុីរ៉ង់ជាសម្ព័ន្ធមិត្តស៊ីរីបានរៀបចំធ្វើនៅក្រុងតេហេរ៉ង់នូវការជួបពិគ្រោះពិភាក្សាគ្នាមួយស្តីពីស៊ីរីដោយមានវត្តមានរបស់ប្រទេស២៩ ក្នុងនោះមានរុស្ស៊ី ចិន អុីរ៉ាក់ អាហ្វហ្គានីស្ថាន និងប៉ាគីស្ថាន ។
ពួកឧទ្ទាមនៃកងទ័ពស៊ីរីសេរីដែលបោះទីតាំងនៅក្រុងអាឡែបជាបេះដូងសេដ្ឋកិច្ចរបស់ប្រទេសដែលការប្រយុទ្ធគ្នានៅទីនោះមានសភាពខ្លាំងក្លាចាប់តាំងពីថ្ងៃទី២០ កក្កដាមក ប្រកាសថា ពួកគេបានដកថយចេញពីទីតាំងនៅសង្កាត់សាឡាហ៊ុដឌីន មកពីមានការបាញ់ផ្លោងខ្លាំងពេកពីសំណាក់កងទ័ពរដ្ឋាភិបាល ។
យោងតាមប្រភពព័ត៌មានសន្តិសុខស៊ីរីថា កងទ័ពរុលទៅមុខយ៉ាងឆាប់សំដៅសង្កាត់សឺអុីវ អាល់ដាវឡា ហើយការវាយលុកនាពេលខាងមុខគឺសំដៅសង្កាត់ស៊ុកកាវី នាភាគខាងត្បូង ក្រុង។សម្រាប់ថ្ងៃទី៩ សីហា បើតាមអង្គការ OSDH ថា ការប្រយុទ្ធគ្នានិងអំពើហិង្សា នាថ្ងៃទី៩ សីហា បណ្តាលឱ្យមនុស្សស្លាប់៩៦នាក់ ក្នុងនោះមានជនស៊ីវិល៣៧នាក់ ។ទូរទស្សន៍រដ្ឋស៊ីរីរាយការណ៍ថា ក្រោយការរត់ចោលជួររបស់នាយករដ្ឋមន្ត្រីលោករីយ៉ាដ ហុីចាប ប្រធានាធិបតីបានតែងតាំងរដ្ឋមន្ត្រីសុខាភិបាលលោកវ៉ាអែល អាល់ហាលគី ជានាយករដ្ឋមន្ត្រីថ្មី ។
ចំណែកអ្នកការទូតអាល់ហ្សេរី ម្នាក់លោកឡាក់ដាប្រាហុីមី ត្រូវបានជំរុញឱ្យបន្តតំណែងពីលោកកូហ្វីអាណាន់ ជាបេសកជនពិសេសរបស់អ.ស.ប និងសម្ព័ន្ធអារ៉ាប់ ទទួលបន្ទុកប្រទេសស៊ីរី ញ៉ាំងឱ្យមានការភ្ញាក់ផ្អើលនានាទីចុងក្រោយ។ ការសម្រេចចិត្តលើការតែងតាំងនោះអាចប្រកាសនាដើមសប្តាហ៍ខាងមុខ។ លោកប្រាហុីមី អាយុ៧៨ឆ្នាំ ធ្លាប់ធ្វើរដ្ឋមន្ត្រីការបរទេសកាលពីដើមទសវត្សឆ្នាំ១៩៩០ ហើយធ្វើតំណាងពិសេស អ.ស.ប សម្រាប់អាហ្វហ្គានីស្ថាន និងអុីរ៉ាក់ក្នុងឆ្នាំ២០០១ ។
លោកកូហ្វីអាណាន់ ដែលទទួលការតែងតាំងជាបេសកជនពិសេសនោះ កាលពីដើមខែសីហា អះអាងថា លោកនឹងមិនបន្តអាណត្តិដែលផុតត្រឹមថ្ងៃទី៣១ សីហាទៀតឡើយ ៕
ចែករំលែកព័តមាននេះ