ខេត្តកំពង់ស្ពឺ ៖ យុវជនម្នាក់ត្រូវបានកម្លាំងកងរាជអាវុធហត្ថស្នាក់នៅឧទ្យានជាតិគិរីរម្យឃាត់ខ្លួនកាលពីវេលាម៉ោង១១យប់ថ្ងៃទី៩ សីហា ២០១២ ខណៈដែលជននោះបានធ្វើសកម្មភាពគាស់ដំបូលផ្ទះអ្នកលក់ដូរម្នាក់បម្រុងចូលលួចទ្រព្យសម្បត្តិ ស្ថិតក្នុងភូមិទី៤ ឃុំត្រែងត្រយឹង ស្រុកភ្នំស្រួច ។
ប្រធានស្នាក់ការកងរាជអាវុធហត្ថឧទ្យានជាតិគិរីរម្យលោកអនុសេនីយ៍ទោ ទិត្យ វណ្ណៈ ឱ្យដឹងថា ដោយមានករណីគាស់ដំបូលផ្ទះបម្រុងចូលលួចទ្រព្យសម្បត្តិក្នុងផ្ទះនាយប់នោះម្ចាស់ផ្ទះឈ្មោះសឹង ឡុង ភេទប្រុស អាយុ៥១ឆ្នាំ និងប្រពន្ធបានដឹងខ្លួនទាន់ ខណៈជនល្មើសគាស់ដំបូលផ្ទះចូលទៅក្នុងបន្ទប់បម្រុងធ្វើសកម្មភាពលួចទ្រព្យសម្បត្តិនោះក៏ស្រែកឆោឡោផ្អើលអ្នកជិតខាង និងផ្តល់ដំណឹងដល់សមត្ថកិច្ចកងរាជអាវុធហត្ថបន្ទាន់ ទើបជនល្មើសដែលពុំទាន់ទាំងបានយកទ្រព្យសម្បត្តិអ្វីផងនោះត្រូវចាប់ខ្លួនតែម្តង។ លោកអនុសេនីយ៍ទោ ទិត្យ វណ្ណៈ បន្តថា ជនល្មើសឈ្មោះកែវ គង្គា ភេទប្រុស អាយុ១៩ឆ្នាំ មុខរបរមិនពិតប្រាកដ មានលំនៅឋានភូមិទី៥ ឃុំត្រែងត្រយឹង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ