នៅជិតអតីតមូលដ្ឋានយោធាអាមេរិកនៅដាណាង បណ្តាកុមារកើតមកពុំគ្រប់លក្ខណៈ និងមនុស្សចាស់ទាំងឡាយដែលកើតមហារីកកំពុងរស់នៅជាមួយនឹងផលវិបាកនៃសារធាតុពុលដែលប្រើប្រាស់ក្នុងសង្គ្រាមវៀតណាមហៅភ្នាក់ងារពណ៌លឿង ។ ក៏ប៉ុន្តែការទន្ទឹងរង់ចាំជាច្រើនទសវត្សទីបញ្ចប់ប្រតិបត្តិការបន្សាបឥទ្ធិពលភ្នាក់ងារពណ៌លឿងនោះបានចាប់ផ្តើមហើយ ។
ភ្នាក់ងារពណ៌លឿងដែលមានសារធាតុពុលឌីអុកស៊ីន ចំនួនដល់ទៅប្រមាណជា៨០លានលីត្រ ត្រូវបានបាចរោយដោយកងទ័ពអាមេរិកលើព្រៃទាំងឡាយនៅភាគខាងត្បូងវៀតណាមដើម្បីបំផ្លាញព្រៃឈើនិងដំណាំទាំងឡាយដែលដាំដោយពួកឧទ្ទាមកុម្មុយនីស្តវៀតណាម ។ ផលិតផលពុលនោះមួយផ្នែកធំត្រូវបានគេយកមកលាយឬស្តុកទុកនិងបញ្ចូលក្នុងយន្តហោះដើម្បីបាចរោយនៅដាណាង ។
ក្នុងប្រតិបត្តិការបោសសំអាតជាប្រវត្តិសាស្ត្រនោះរបស់អាមេរិកនិងវៀតណាមជាផ្លូវការចាប់ផ្តើមពីថ្ងៃទី៩ សីហាទៅ គឺនៅលើផ្ទៃដីដែលរងការរោយនៃភ្លៀងពណ៌លឿងត្រូវដុតកំដៅឱ្យដល់សីតុណ្ហភាពខ្ពស់គ្រប់គ្រាន់ដើម្បីប្រែក្លាយឌីអុកស៊ីនទៅជាសមាសភាពដែលលែងមានគ្រោះថ្នាក់ ។
មូលដ្ឋានអាកាសចរណ៍ដាណាង ដែលតំបន់ជុំវិញនោះត្រូវហាមឃាត់មិនឱ្យមនុស្សចូលទើបតែ៥ឆ្នាំចុងក្រោយនេះ ជាទីតាំងមួយក្នុងចំណោមទីតាំងដែលមានសារធាតុពុលខ្ពស់ទាំងឡាយលើសពី៤០០ដងពីបទដ្ឋានដែលអាចទទួលយកបាន ។ សារធាតុពុលនោះបង្កឱ្យមានជំងឺមហារីក ក្មេងកើតមកមិនគ្រប់លក្ខណៈ និងជំងឺឯទៀតៗ ។
ក្រុងហាណូយវាយតម្លៃថាមនុស្សរហូតដល់ទៅ៣លាននាក់រងការប៉ះពាល់ដោយសារធាតុនោះ ហើយមនុស្សប្រមាណជា១លាននាក់នៅរងទុក្ខនៅឡើយដោយសារផលវិបាករបស់វា ។ ក៏ប៉ុន្តែបណ្តាអ្នករងគ្រោះវៀតណាមពុំទាន់បានទទួលការចេញសងការខូចខាតខាងហិរញ្ញវត្ថុពីសហរដ្ឋអាមេរិកនៅឡើយ ៕
ចែករំលែកព័តមាននេះ