រាជធានីភ្នំពេញ ៖ នៅសង្វៀនស្ថានីយទូរទស្សន៍ CTN នាថ្ងៃអាទិត្យ ទី១២ សីហា នេះ ការប្រកួតប្រដាល់ដណ្តើមខ្សែក្រវាត់ K-cement ប្រភេទទម្ងន់៥៤គីឡូក្រាម វគ្គជម្រុះវិលជុំក្នុងពូលB ចាប់ផ្តើមហើយ ។ ពៅ សុីយ៉េត ដែលជាសិស្សគុនក្លិបក្រុងប៉ោយប៉ែត ខេត្តបន្ទាយមានជ័យ ត្រូវជួបប្រកួតជាមួយ អាំង សំអាត សិស្សគុនក្លិបតាព្រហ្មមានជ័យបង្ក្រាបគ្រឿងញៀន ។
កាលពីថ្ងៃអាទិត្យសប្តាហ៍មុន ការប្រកួតក្នុងពូលA កីឡាករ អុឹង បូរ៉ា មកពីក្លិបព្រះខ័នរាជ ប្រកួតឈ្នះពិន្ទុកីឡាករ ឆាំ រ៉ែម មកពីក្លិបសិង្ហ កីឡា ទទួលបាន៣ពិន្ទុមុនគេ ចំណែកឯលើកនេះគេមិនទាន់ដឹងថា កីឡាករណាមានសំណាងរកបាន៣ពិន្ទុទៀតនោះទេ ។ សំអាត និង ស៊ីយ៉េត មានថ្វីដៃប្រកួតនៅលើសង្វៀនប្រហាក់ប្រហែលគ្នា ឯមាឌនិងកម្ពស់ក៏មិនលើសមិនខ្វះគ្នាប៉ុន្មានដែរ ។
សំអាត មានផ្លែជង្គង់ និងកែងល្អ រីឯស្នៀតជើងនិងកណ្តាប់ដៃក៏អាចប្រើការបានល្អណាស់ដែរ ចលនាវាយចេញមានភាពរហ័សរហួនគ្រាន់បើ ប៉ុន្តែចិត្តមិនសូវសឿងប៉ុន្មាន ឡើយ ។ ឯស្នៀតដៃនិងស្នៀតជើងរបស់ ស៊ីយ៉េត វិញ ពេលវាយនិងទាត់ចេញម្តងៗមានទម្ងន់ធ្ងន់ បេើគេចមិនទាន់ទេអាចគ្រោះថ្នាក់ដល់សន្លប់បាន ប៉ុន្តែចលនាវាយចេញរបស់គេមិនសូវជារហ័ស រហួនប៉ុន្មានទេ ។ ទោះបីជាបែបណា កម្លាំងរបស់គេខ្លាំងអាចប្រកួតបាន៥ទឹកពេញមិនលំបាកឡើយ ជាងនេះទៅទៀត ស៊ីយ៉េតអាចវាយចេញពីចម្ងាយក៏បានចូលកៀកក៏បានគឺល្អដូចគ្នា ។
សូមបញ្ជាក់ថា នៅពូលB ក្រៅពី ស៊ីយ៉េត និងសំអាត គឺមានកីឡាករ សារឹម ង៉ា មកពីសមាគមកីឡាប្រដាល់ក្រសួងការពារជាតិ និង ចេង រិទ្ធី មកពីក្លិបសាលវ័ន្តកីឡា ។ ដោយឡែកចំពោះគូប្រកួតមិត្តភាពវិញ ផាវ ភឿត មកពីក្លិបកងពលធំអន្តរាគមន៍លេខ៣ព្រះវិហារ ជួបប្រកួតជាមួយ សាំង ស៊ីថា មកពីក្លិបសមាគមកីឡាប្រដាល់ក្រសួងការពារ ជាតិ ។
ធិន សុវណ្ណ មកពីក្លិបកងពលតូចលេខ៧០ ជួបប្រកួតជាមួយ សុខ ចិន្តា មកពីក្លិបឃ្លាំងមឿងកីឡា ។ នូវ ស៊ីថា មកពីក្លិបរាជសីហ៍បង្ក្រាបគ្រឿងញៀនខេត្តរតនគិរី ជួបប្រកួតជាមួយ ឡុង ប៊ុនរ៉ាត់ មកពីក្លិបសាលវ័ន្តកីឡា និង ជ័យប៊ុនសុង មកពីក្លិបខេមរមិន្ទមានឫទិ្ធ ជួបប្រកួតជាមួយ កុសល វិសាល មកពីក្លិបសាលវ័ន្តកីឡា ៕
ចែករំលែកព័តមាននេះ