រាជធានីភ្នំពេញ ៖ ព្រឹកថ្ងៃទី១០ សីហា សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសលើជនជាប់ចោទចំនួន៥នាក់ អតីតជាសន្តិសុខរោងចក្រអីុស្ទិចហ្គា មែន ដែលស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ដាក់ពន្ធនាគារម្នាក់១ឆ្នាំ និងរួមគ្នាសងទៅដើមបណ្តឹង៤១.១៧៧ដុល្លារ។ សាលក្រមនេះបានបើកផ្លូវ និងទុកពេល៣០ថ្ងៃឱ្យភាគីណាមួយមិនសុខចិត្តប្តឹងទាស់ទៅសាលាឧទ្ធរណ៍ ។
ពិធីប្រកាសសាលក្រមនេះធ្វើឡើងដោយលោកសេង នាង ប្រធានក្រុមប្រឹក្សា លោកហោ លីណា ព្រះរាជអាជ្ញារងអមសាលាដំបូងរាជធានីភ្នំពេញ និងបានធ្វើចំពោះមុខជនត្រូវចោទ ១-ឈ្មោះសៅ វណ្ណៈ ភេទប្រុស អាយុ២៤ឆ្នាំ ២-ឈ្មោះហួត ទី ភេទប្រុស អាយុ១៨ឆ្នាំ ៣-ឈ្មោះកែប វ៉ា ភេទប្រុស អាយុ១៨ឆ្នាំ ៤-ឈ្មោះហុល ហ៊ា ភេទប្រុស អាយុ៣៧ឆ្នាំ ៤នាក់នេះគឺជាសន្តិសុខរោងចក្រត្រូវផ្តន្ទាទោសដាក់ពន្ធនាគារម្នាក់ៗរយៈពេល១ឆ្នាំ និង៥-ឈ្មោះហេង ប៊ុនស ភេទប្រុស អាយុ៣៦ឆ្នាំ ជាអ្នកទៅទិញក្រណាត់ និងខោអាវពីសន្តិសុខ៤នាក់ខាងលើដាក់ពន្ធនាគារយៈពេល១ឆ្នាំដែរ ។ ប៉ុន្តែទោសនេះត្រូវព្យួរ ហើយសាលក្រមក៏បានផ្តន្ទាទោសទៅលើឈ្មោះហេង ប៊ុនស ដោយកំបាំងមុខ ពោលគឺជនត្រូវចោទបានរត់គេចខ្លួនបាត់ទៅហើយ ។
គួររំលឹកថា កាលពីថ្ងៃទី២៥ ធ្នូ ឆ្នាំ២០១១ និងថ្ងៃទី២ មករា ២០១២ ជនត្រូវចោទទាំង៥នាក់បានធ្វើសកម្មភាពលួចខោអាវ និងក្រណាត់រោងចក្រចំនួន២លើកសរុបអាវយឺត៥.៩៥៩អាវ ក្រណាត់១៨ដុំ គិតជាប្រាក់ជាង៤ម៉ឺនដុល្លារ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ