ខេត្តប៉ៃលិន ៖ កុមារាម្នាក់អាយុ១២ឆ្នាំ បានរងរបួសធ្ងន់ដោយសាររលាកទឹកក្តៅកំពុងពុះត្រូវដៃស្តាំ និងចំហៀងខ្លួនផ្នែកខាងស្តាំ ខណៈដែលកុមារារូបនេះដាំទឹកក្តៅ (ថ្នាំខ្មែរ) មួយកំសៀវពុះលើកយកទៅឱ្យម្តាយពិសារ ហើយរបូតដៃធ្លាក់កំសៀវ បណ្តាលឱ្យទឹកក្តៅខ្ទាតត្រូវរលាកតែម្តង ។
ហេតុការណ៍រលាកទឹកក្តៅនេះបានកើតឡើងកាលពីវេលាម៉ោង៨និង១០នាទីយប់ថ្ងៃទី៧ សីហា ២០១២ ស្ថិតក្នុងរោងចាំចម្ការនៅខេត្តចន្ទបូរី ប្រទេសថៃ ។ ក្រោយពីរលាកភ្លាមម្តាយបាននាំទៅឱ្យគ្រូខ្មែរស្តោះផ្លុំចំនួន២ថ្ងៃ លុះរបួសកាន់តែធ្ងន់ធ្ងរក៏បញ្ជូនទៅព្យាបាលនៅមន្ទីរពេទ្យខេត្តចន្ទបូរី តែដោយនៅទីនោះគេទារសេវាថ្លៃពេក គ្មានប្រាក់ព្យាបាលកូន ទើបបញ្ជូនមកកាន់មន្ទីរពេទ្យបង្អែកខេត្តប៉ៃលិន កាលពីល្ងាចថ្ងៃទី៩ សីហា នេះ ។
ប្រភពព័ត៌មានបានឱ្យដឹងថា កុមារារងគ្រោះឈ្មោះរឿន ម៉េងឈាង អាយុ១២ឆ្នាំ មានបងប្អូន៣នាក់ ស្រី២នាក់ ឪពុកឈ្មោះសំ រឿន អាយុ៣៧ឆ្នាំ ម្តាយឈ្មោះគី អ៊ន់ អាយុ៣១ឆ្នាំ ជាកម្មករ មានស្រុកកំណើតនៅភូមិស្រក ឃុំស្រក ស្រុកកំពង់សៀម ខេត្តកំពង់ចាម ។ ប្រភពបន្តឱ្យដឹងទៀតថា ដោយជីវភាពខ្វះខាត និងជំពាក់លុយគេ ទើបប្តីប្រពន្ធ និងកូនទាំង៣នាក់ នេះសម្រេចចិត្តទៅធ្វើការងារនៅស្រុកថៃក្នុងខេត្តចន្ទបូរី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ