ខេត្តកំពង់ឆ្នាំង ៖ បុរសម្នាក់ជិះម៉ូតូថ្មីដែលទើបនឹងទិញបានទៅដួលលើផ្លូវលំក្រាលក្រួសក្រហម បណ្តាលឱ្យស្លាប់បាត់បង់ជីវិតកាលពីវេលាម៉ោង៥និង៣០នាទីល្ងាចថ្ងៃទី៩ សីហា ២០១២ នៅចំណុចស្រែទំនាបត្រពាំងក្រវ៉ាន់ ស្ថិតក្នុងភូមិក្រាំងលាវ ឃុំក្រាំងលាវ ស្រុករលាប្អៀរ ។
មន្ត្រីប៉ូលិសស្រុករលាប្អៀរ បានប្រាប់តាមទូរស័ព្ទថា ជនរងគ្រោះមានឈ្មោះអ៊ុន ផង់ អាយុ៤៥ឆ្នាំ មានទីលំនៅភូមិក្រាំងលាវ ឃុំក្រាំងលាវ ។ ប្រភពដដែលបានបន្តដោយស្រង់សម្តីបងប្អូនជនរងគ្រោះថា បុរសរងគ្រោះទើបបានទិញម៉ូតូថ្មីម៉ាកស្មាស់រីវ៉ូ ស៊េរី២០១២ ពណ៌ ខ្មៅ មួយគ្រឿង ហើយនៅមុនពេលកើតហេតុបានជិះម៉ូតូថ្មីដែលទើបនឹងទិញនោះសាក និងទៅមើលស្រែផង ប៉ុន្តែនៅល្ងាចនោះពេលជិះចេញផុតបានបន្តិចក៏មានភ្លៀងធ្លាក់ជាខ្លាំង ខណៈនោះជនរងគ្រោះប្រហែលជាជិះម៉ូតូក្នុងល្បឿនលឿន ហើយគាប់ជួនផ្លូវរអិល និងមិនសូវប្រសប់បើកម៉ូតូផងក៏ដួលបោកទៅនឹងផ្លូវ បណ្តាលឱ្យរងរបួសជាទម្ងន់ និងបន្តិចក្រោយមកក៏ស្លាប់បាត់បង់ជីវិតតែម្តង ។
តាមប្រជាពលរដ្ឋដែលនៅផ្ទះជិតជនរងគ្រោះបាននិយាយថា ជនរងគ្រោះខិតខំសន្សំប្រាក់ទម្រាំបានគ្រប់ទិញម៉ូតូថ្មីនេះ ប៉ុន្តែពេលទិញបានដូចយកមកសម្លាប់ជីវិតខ្លួនឯងតែម្តង ៕
ចែករំលែកព័តមាននេះ