ខេត្តកំពង់ធំ ៖ នៅសាលប្រជុំស្នងការដ្ឋាននគរបាលខេត្ដ កាលពីព្រឹកថ្ងៃទី៩ សីហា ២០១២ បានបើកវគ្គបណ្ដុះបណ្ដាលស្ដីអំពីយេនឌ័រ និងអំពើហិង្សាលើស្ដ្រីដែលមានរយៈពេល២ថ្ងៃ គឺចាប់ពីថ្ងៃទី៩ដល់ថ្ងៃទី១០ សីហា ក្រោមវត្ដមានលោកស្រីឧត្ដមសេនីយ៍ទោ ង៉ែត ម៉ាលី អនុប្រធាននាយកដ្ឋានកណ្ដាលនគរបាលយុត្ដិធម៌ និងជាអនុប្រធានអចិន្ដ្រៃយ៍ក្រុមការងារយេនឌ័រនៃអគ្គស្នងការនគរបាលជាតិ លោកអ៊ុត សំអន អភិបាលរងខេត្ដ លោកឧត្ដមសេនីយ៍ត្រី ផាន់ សុផេង ព្រមទាំងមានការចូលរួមពីស្នងការនគរបាលខេត្ដ អភិបាលក្រុង-ស្រុកប្រធានមន្ទីរកិច្ចការនារីលោកអធិការ អធិការរង និងមន្ដ្រីជាច្រើនរូបទៀត។
លោកស្រីឧត្ដមសេនីយ៍ទោ ង៉ែត ម៉ាលី បានមានប្រសាសន៍ឱ្យដឹងថា ការបង្កើតវគ្គបណ្ដុះបណ្ដាលយេនឌ័រនេះក្នុងគោលបំណងបង្កា និងបង្ក្រាបរាល់បទល្មើស ដើម្បីការពារសន្ដិសុខសុវត្ថិភាពសង្គម ក្នុងនោះក៏មិនអាចខ្វះបានការចូលរួមចំណែករបស់នគរបាលស្ដ្រីឡើយ។ សកម្មភាពយេនឌ័រ សំដៅការថែរក្សាសេចក្ដីថ្លៃថ្នូរសុខមាលភាពសង្គម និងលុបបំបាត់ចោលនូវការរើសអើងប្រឆាំង នឹងស្ដ្រីដូចជាអំពើហិង្សាក្នុងគ្រួសារ ការរំលោភបំពានផ្លូវភេទ អំពើជួញដូរមនុស្សនិងការធ្វើអាជីវកម្មផ្លូវភេទ។ អំពើល្មើសទាំងនេះ បានប៉ះពាល់យ៉ាងធ្ងន់ធ្ងរដល់ការអភិវឌ្ឍលើគ្រប់វិស័យរបស់រដ្ឋ ពិសេសគឺការបំផ្លាញគោលការណ៍មូលដ្ឋានគ្រឹះនៃសីលធម៌គ្រួសារនិងសង្គម។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ