ខេត្តកំពង់ឆ្នាំង ៖ បុរសម្នាក់រងរបួសធ្ងន់ ខណៈពេលជិះម៉ូតូឌុបគ្នា ត្រូវជនសង្ស័យលបកាប់ពីរកាំបិតផ្គាក់ ចំណែកម្នាក់ទៀតលោតចេញពីម៉ូតូទាន់មិនមានរងរបួសទេ ។ ហេតុការណ៍នេះកើតឡើងកាលពីវេលាម៉ោង៦និង៣០នាទីល្ងាចថ្ងៃទី៩ សីហា ២០១២ តាមបណ្តោយផ្លូវជាតិលេខ៥ ស្ថិតក្នុងភូមិថ្លកយល់ ឃុំតាជេស ស្រុកកំពង់ត្រឡាច ។
តាមសម្តីបងប្អូនដែលជូនមកព្យាបាលនៅមន្ទីរពេទ្យប្រាប់ឱ្យដឹងថា ជនរងគ្រោះឈ្មោះកុយ ផាត ភេទប្រុស អាយុ៣៥ឆ្នាំ ជាអ្នករត់ម៉ូតូឌុប ស្នាក់នៅភូមិសាវង្ស ឃុំតាជេស ស្រុកកំពង់ត្រឡាច រងរបួសក្បាលផ្នែកខាងឆ្វេងត្រូវបានគ្រូពេទ្យដេរអស់១០ថ្នេរ និងរយះបបូរមាត់លើ។ ចំណែកម្នាក់ទៀតដែលអង្គុយខាងក្រោយលោតចេញទាន់ឈ្មោះរ៉ា ភេទប្រុស អាយុ២៥ឆ្នាំ មុខរបរលាងម៉ូតូ ស្នាក់នៅភូមិជាមួយគ្នា ។
ប្រភពដដែលបន្តទៀតថា ជនដៃដល់ឈ្មោះវ៉េង ភេទប្រុស អាយុ២៨ឆ្នាំ ជាកសិករ ស្នាក់នៅភូមិកើតហេតុខាងលើ បន្ទាប់ពីធ្វើសកម្មភាពរួចរត់គេចខ្លួនបាត់ ។ មុនពេលកើតហេតុជនរងគ្រោះបានជិះម៉ូតូសង់សេ១០០ ផលិតនៅប្រទេសចិន ពណ៌ខ្មៅ គ្នា២នាក់ ទៅលេងផ្ទះបងប្អូនជិតភូមិកើតហេតុ ខណៈពេលត្រឡប់មកផ្ទះវិញ ស្រាប់តែត្រូវជនសង្ស័យលបចេញពីកន្លែងស្ងាត់មកកាប់ចំនួន២កាំបិតផ្គាក់បណ្តាលឱ្យដេកដួលក្នុងថ្លុកឈាមតែម្តង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ