ខេត្តបន្ទាយមានជ័យ ៖ ដោយមានកិច្ចប្រតិបត្តិការជាមួយកម្លាំងកងពលតូចលេខ៥១ និងកម្លាំងកងរថក្រោះ ព្រមទាំងកងកាំភ្លើងធំប្រចាំទិសខេត្ត នៅរសៀលថ្ងៃទី៩ សីហា ២០១២ កម្លាំងនគរបាលស្រុកព្រះនេត្រព្រះ ចំនួន៨៥នាក់ បានធ្វើការសាកបាញ់គ្រាប់ពិត ។ កម្មវិធីប្រព្រឹត្តទៅក្រោមអធិបតីភាពលោកស្រីវរសេនីយ៍ឯក ឌី សុជាតិ ស្នងការរងតំណាងលោកឧត្តមសេនីយ៍ស្នងការនគរបាលខេត្ត និងដោយមានការចូលរួមពីលោកឆាយ ថ្នម អភិបាលរងស្រុកព្រះនេត្រព្រះ តំណាងលោកមេបញ្ជាការ មេបញ្ជាការរងកងពលតូចលេខ៥១ កងរថក្រោះ ព្រមទាំងកងកាំភ្លើងធំប្រចាំទិសខេត្តបន្ទាយមានជ័យ លោកអធិការ អធិការរង និងមេបញ្ជាការកងរាជអាវុធហត្ថស្រុកមេបញ្ជាការសឹករងស្រុក និងលោកមេឃុំចំនួន៣ឃុំចូលរួមផងដែរ ។
បន្ទាប់លោកវរសេនីយ៍ត្រី កែវ ប៊ុនយឿន អធិការនគរបាលស្រុកព្រះនេត្រព្រះ ធ្វើសេចក្តីរាយការណ៍ជុំវិញសភាពការណ៍សន្តិសុខ សណ្តាប់ធ្នាប់ និងលក្ខណៈភូមិសាស្ត្ររួចមក ។ លោកអធិការបានបញ្ជាក់ថា កម្លាំងដែលត្រូវចូលរួមធ្វើសកម្មភាពបាញ់គ្រាប់ពិតនាពេលនេះ មានចំនួន៨៥នាក់ ក្នុងនោះស្រីចំនួន៣នាក់ ជាកម្លាំងមកពីតាមបណ្តាប៉ុស្តិ៍រដ្ឋបាលចំនួន៩ ក្នុងស្រុក និងកម្លាំងជំនាញនៅកន្លែងអធិការដ្ឋាននគរបាលស្រុក ។
ថ្លែងនៅក្នុងឱកាសនោះលោកស្រីវរសេនីយ៍ឯក ឌី សុជាតិ ស្នងការរងតំណាងលោកឧត្តមសេនីយ៍ត្រី ខេង ស៊ុម ស្នងការនគរបាលខេត្ត បានមានប្រសាសន៍ថា ដើម្បីរក្សាសន្តិសុខ សណ្តាប់ធ្នាប់ សុវត្ថិភាពជូនប្រជាពលរដ្ឋក្នុងមូលដ្ឋានជាងនេះទៅទៀត ដើម្បីទប់ទល់ទៅនឹងសភាពការណ៍ដែលកើតឡើងជាយថាហេតុផងនោះ និងដោយមានការឯកភាពពីលោកឧត្តមសេនីយ៍ស្នងការនគរបាលខេត្តក្នុងការហ្វឹកហាត់ជំនាញ ក៏ដូចជាពង្រឹងស្មារតីរបស់កងកម្លាំងពេលដែលមានសភាពការណ៍អ្វីកើតមាននៅក្នុងមូលដ្ឋាន ។ នៅរសៀលថ្ងៃនេះកម្លាំងនគរបាលស្រុកព្រះនេត្រព្រះបានធ្វើការសាកល្បងបាញ់គ្រាប់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ