បណ្តាអ្នកទទួលខុសត្រូវហ្វ៊ីលីពីនថ្លែងកាលពីថ្ងៃទី៩ សីហាថា មនុស្ស១៩នាក់ស្លាប់នៅក្រុងម៉ានីលហើយមនុស្សដល់ទៅជិត២លាននាក់ត្រូវជម្លៀសចេញក្រោយភ្លៀងធ្លាក់យ៉ាងខ្លាំងដែលជន់លិចភាគខាងជើងនិងភាគកណ្តាលហ្វ៊ីលីពីនរយៈពេលប៉ុន្មានថ្ងៃចុងក្រោយនេះ ។
ក្រុមប្រឹក្សាជាតិគ្រប់គ្រងគ្រោះថ្នាក់និងបង្ការគ្រោះមហន្តរាយធម្មជាតិថ្លែងថា មនុស្ស៩នាក់ស្លាប់ក្នុងការបាក់ដី មនុស្ស៨នាក់ស្លាប់ដោយលង់ទឹក ហើយ២នាក់ស្លាប់ដោយខ្សែភ្លើងឆក់ ។ មនុស្ស៤នាក់ត្រូវរបួសហើយ៣នាក់ទៀតនៅតែបាត់ខ្លួន ។ សរុបមនុស្សដល់ទៅ១,៩៥លាននាក់រងការប៉ះពាល់ដោយសារទឹកជំនន់ដ៏អាក្រក់បំផុត ដែលប្រទេសនេះពុំធ្លាប់ជួបប្រទះចាប់តាំងពីឆ្នាំ២០០៩មក ខណៈព្យុះ HAIKUI ធ្វើឱ្យក្រុងម៉ានីលជាប់គាំងក៏ដូចជាផ្នែកមួយធំនៃកោះលូហ្សុងដែរ ។
កាលពីព្រឹកថ្ងៃទី៩ សីហា ព្យុះនោះបានចាកចេញពីហ្វ៊ីលីពីនតែតំបន់ក្រុងម៉ានីល និងបណ្តាខេត្តជាប់ជិតខាងបន្តរងការធ្លាក់ភ្លៀងទៀត ៕
ចែករំលែកព័តមាននេះ