ខេត្តកណ្តាល ៖ ក្មេងទំនើង២ក្រុមដែលម្ខាងមានគ្នា៤នាក់ ឯម្ខាងទៀតមានគ្នា២នាក់ និងធ្លាប់មានគំនុំវាយតប់គ្នាពីពេលមុននោះ ពេលនេះជួបមុខគ្នា ក៏វាយតប់គ្នាម្តងទៀតដើម្បីជម្រះបញ្ជីចាស់ បង្កឱ្យមានការភ្ញាក់ផ្អើលតាមដងផ្លូវ និងត្រូវបានប៉ូលិសស្រុកអង្គស្នួល និងប៉ូលិសប៉ុស្តិ៍បែកចាន ចុះទៅព័ទ្ធចាប់បានញាត់ចូលទ្រុងទាំងសងខាង ។ ហេតុការណ៍នេះបានកើតឡើងកាលពីវេលាម៉ោង៦ និង២៥នាទីល្ងាចថ្ងៃទី៨ សីហា ឆ្នាំ២០១២ នៅតាមផ្លូវលំស្ថិតក្នុងភូមិបែកចាន ឃុំបែកចាន ស្រុកអង្គស្នួល ។
ក្មេងទំនើងទាំងនោះត្រូវបានគេដឹងថា ក្រុមទី១មានគ្នាចំនួន៤នាក់ គឺ១-ឈ្មោះវង្ស ឆកា ភេទប្រុស អាយុ១៧ឆ្នាំ ជាកម្មកររោងចក្រ ២-ឈ្មោះគីម វាសនា ភេទប្រុស អាយុ១៧ឆ្នាំ ជាកម្មកររោងចក្រ ទាំង២នាក់នេះស្នាក់នៅក្នុងភូមិអង្គស្នួលទី១ ឃុំពើក ស្រុកអង្គស្នួល៣-ឈ្មោះផាត សុភ័ណ្ឌ ភេទប្រុស អាយុ១៧ឆ្នាំ ជាកម្មកររោងចក្រ និង៤-ឈ្មោះផល សុខា ភេទប្រុស អាយុ១៦ឆ្នាំ មុខរបរលក់ដូរ ពួកគេមានទីលំនៅក្នុងភូមិអង្គស្នួលទី២ ឃុំពើក។ ដោយឡែកក្មេងទំនើងក្រុមទី២ មានគ្នា២នាក់ ដែលម្នាក់ឈ្មោះសាន់ វាសនា ភេទប្រុស អាយុ២១ឆ្នាំ ជាកម្មកររោងចក្រ មានទីលំនៅភូមិព្រៃអំពិល ឃុំជម្ពូព្រឹក្ស ស្រុកឧដុង្គ ខេត្តកំពង់ស្ពឺ និងម្នាក់ទៀតឈ្មោះចេង ហឿន ភេទប្រុស អាយុ១៨ឆ្នាំ ជាកម្មកររោងចក្រ មានទីលំនៅក្នុងភូមិ-ឃុំជាមួយគ្នា ហើយក្រោយពេលកើតហេតុ ប៉ូលិសបានចុះទៅធ្វើការឃាត់ខ្លួនបានទាំងសងខាង និងដកហូតបានដាវសាមូរ៉ៃមួយទៀតផង ។
មន្ត្រីប៉ូលិសស្រុកអង្គស្នួល ឱ្យដឹងថា ក្មេងទំនើងទាំង២ក្រុមនេះធ្លាប់មានទំនាស់វាយតប់គ្នាកាលពីប៉ុន្មានថ្ងៃមុន ដោយក្រុមក្មេងទំនើងដែលមានគ្នា៤នាក់បានព្រួតគ្នាវាយទៅលើក្រុមដែលមានគ្នា២នាក់ ប៉ុន្តែមិនបណ្តាលឱ្យមានអ្នករងរបួសនោះទេ ព្រោះវាយដោយដៃទទេ បន្ទាប់មកពួកគេក៏បានបែកគ្នាអស់ទៅ ។ លុះដល់ថ្ងៃកើតហេតុ ក្រុមក្មេងទំនើងដែលមានគ្នា២នាក់បាននាំគ្នាស្ទុះចូលទៅវាយ២-៣ដៃដើម្បីជម្រះគំនុំចាស់ និងជាការសងសឹក ហើយក្រុមគូទំនាស់មិនបានសម្ងំស្ងៀមទេ គឺវាយតបតវិញបង្កឱ្យមានការភ្ញាក់ផ្អើលទាំងល្ងាច ទើបកម្លាំងប៉ូលិសស្រុកអង្គស្នួល និងប៉ូលិសប៉ុស្តិ៍បែកចានចេញអន្តរាគមន៍ចាប់ខ្លួនបានទាំងសងខាងតែម្តង ។
ប្រភពដដែលបានបន្តទៀតថា ក្រោយពេលកើតហេតុ ពួកគេត្រូវបានបញ្ជូនទៅកាន់ផ្នែកព្រហ្មទណ្ឌស្រុកអង្គស្នួល ដើម្បីកសាងសំណុំរឿង និងធ្វើការអប់រំ ព្រមទាំងឱ្យពូកគេធ្វើកិច្ចសន្យាកែខ្លួនពីក្មេងទំនើងទៅជាសិស្សល្អ និងកូនល្អ រួចឱ្យឪពុកម្តាយទៅធានាយកត្រឡប់ទៅផ្ទះវិញ ៕
ចែករំលែកព័តមាននេះ