រាជធានីភ្នំពេញ ៖ កាលពីវេលាម៉ោង១១ និង១០នាទីយប់ថ្ងៃទី៨ សីហា សាកសពបុរសម្នាក់ត្រូវបានគេប្រទះឃើញដេកស្លាប់ក្បាលក្នុងទឹកជើងលើគោក ក្នុងដីឡូត៍មួយកន្លែងដែលមានទឹកដក់ច្រើន ស្ថិតនៅខាងត្បូងបុរីឧទ្យានតាង៉ូវក្រោម ក្នុងក្រុម១ ភូមិតាង៉ូវក្រោម សង្កាត់និរោធ ខណ្ឌមានជ័យ ។
អ្នករស់នៅជិតកន្លែងកើតហេតុ បានឱ្យដឹងថា នៅវេលាម៉ោងខាងលើពួកគេបានឮសូរសំឡេងឆ្កែព្រុសខុសពីធម្មតា ក៏នាំគ្នាដើរទៅរកមើលស្រាប់តែឃើញភ្លើងពិលចាំងចោលនៅលើស្មៅក្នុងដីឡូត៍មួយកន្លែង ទើបនាំគ្នាចូលទៅពិនិត្យមើលឱ្យបានច្បាស់ស្រាប់តែឃើញសាកសពបុរសម្នាក់ដេកស្លាប់ក្បាលចូលក្នុងទឹកជើងនៅលើគោកធ្វើឱ្យគ្រប់គ្នាមានការភ្ញាក់ផ្អើលឆោឡោតែម្តង។
តាមប្រភពដដែលបន្តទៀតថា បុរសដែលស្លាប់បាត់បង់ជីវិតនេះឈ្មោះរី ជឿន អាយុ៣៥ឆ្នាំ ជាកម្មករសំណង់ ស្នាក់នៅជិតកន្លែងកើតហេតុ មានស្រុកកំណើតនៅភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ។ មុនពេលកើតហេតុ ជនរងគ្រោះបានអូសខ្សែភ្លើងមួយចង្វាយតជាមួយឧបករណ៍ឆក់ត្រីដែលធ្វើពីដែកតដងឫស្សីដូចដងបបក់ត្រីដើេរឆក់ត្រីក្នុងដីឡូត៍ទំនេរមួយកន្លែងដែលមានទឹកមិនជាជ្រៅប៉ុន្មានទេ តែមានត្រីច្រើន ។
ប្រភពព័ត៌មានបន្តថា ពេលដើរឆក់នោះមិនដឹងជាជនរងគ្រោះភ្លាត់ស្នៀតបែបណាទេ ស្រាប់តែឆក់ខ្លួនឯងបណ្តាលឱ្យប្រកាច់ដួលក្បាលចូលក្នុងទឹកស្លាប់ភ្លាមៗតែម្តង ។ ចំណែកខ្លះទៀតថា ពេលស្ពាយប្រដាប់ឆក់ដើរឆក់ត្រីនោះទំនងជាជនរងគ្រោះត្រូវចរន្តភ្លើងឆក់ខ្លួនឯងក៏រអិលជើងដួលដាំក្បាលចូលទឹកជើងនៅលើគោកបណ្តាលឱ្យឈ្លក់ទឹកស្លាប់តែម្តង ។ នៅលើខ្លួនប្រាណជនរងគ្រោះ គេឃើញមានស្នាមរបួសរលាត់ដើមទ្រូង រយះបាតដៃ ហើយម្រាមដៃទាំងអស់មានសភាពរួញក្រញង់ ។
ក្រោយពេលកើតហេតុសាច់ញាតិជនរងគ្រោះមិនបានធ្វើការប្តឹងផ្តល់ទៅសមត្ថកិច្ចទេ ដោយបងប្រុសបង្កើតឈ្មោះរី អែម អាយុ៤១ឆ្នាំ ជាអ្នកចេញមុខមកទទួលយកសពប្អូនប្រុសទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ